Uruqvay və Meksika birləşib Fransanı evə yollayacaqmı?

Bu gün futbol üzrə dünya çempionatında A və B qruplarında son oyun günüdür. Qruplarda yaranmış vəziyyətə bir daha nəzər yetirək.

 

A qrupu

 

19:00 Meksika – Uruqvay

19:00 CAR – Fransa

 

Hər şey Meksika – Uruqvay oyununun nəticəsindən asılıdır. Bu komandaların məqsədi yalnız pley-off mərhələsinə çıxmaqdırsa, sakitcə heç-heçə edərək hər ikisi adlarını 1/8 final iştirakçılarının sırasına yazdıra bilərlər. Belə olarsa, Fransa – Cənubi Afrika matçının heç bir əhəmiyyəti qalmayacaq.

 

Lakin məntiqə əsaslansaq, Uruqvay – Meksika matçının heç-heçə bitməsi yalnız Uruqvaya sərf edir. Cənubi amerikalıların qələbəsi və ya heç-heçə onları B qrupunun ikincisinə çıxarır. Böyük ehtimalla bu, ya Cənubi Koreya, ya da Yunanıstan olacaq. A qrupunda ikinci yeri tutaraq pley-off mərhələsinə vəsiqə qazanacaq komandaya isə qibtə etmək olmaz – onun rəqibi çox güman ki, Argentina yığması olacaq.

 

Qalmaqallardan başını itirmiş Fransanın şansı varmı? Bəli. Bunun üçün Fransa mümkün qədər böyük hesabla (heç olmasa 3 top fərqi ilə) CAR komandasına qalib gəlməli və Meksikanın Uruqvay üzərində qələbəsinə ümid etməlidir.

 

Pley-off mərhələsinə çıxmaq üçün hətta CAR komandası da ümid bəsləyə bilər. Lakin bu, daha fantastik və real görünməyən şərtlər daxilində mümkündür – Cənubi afrikalılar fransızları 2-3 top fərqi ilə udmalı, eyni zamanda Uruqvay Meksikanı təxminən eyni fərqli hesabla məğlub etməlidir.

 

 

B qrupu

 

23:30 Argentina – Yunanıstan

23:30 Cənubi Koreya – Nigeriya

 

Burada vəziyyət bir qədər sadədir. Qrupda birinci yeri tutaraq pley-off mərhələsinə çıxmaq üçün Argentinaya Yunanıstana qarşı oyunda heç-heçə də kifayətdir.

 

İkinci yerə ən real namizəd Cənubi Koreya yığmasıdır. Argentina öz oyununu oynayaraq yunanlara uduzmasa, koreyalılara Nigeriya ilə oyunda yalnız heç-heçəyə oynamaq qalır.

 

Yunanıstanın pley-off mərhələsinə çıxması bir neçə şərtə bağlıdır – ya Argentinaya qalib gəlmək (inandırıcı görünmür), ya da heç-heçə edərək digər oyunda Nigeriyanın qələbəsinə dua etmək lazımdır.

 

Nə qədər qəribə görünsə də, bir xalı belə olmayan Nigeriya da çox rahat şəkildə 1/8 finala vəsiqə qazana bilər. Bunan üçün sadəcə Cənubi Koreyaya qalib gəlmək və Maradonanın komandasının qələbəsini gözləmək lazımdır.

 

Maraqlı bir ehtimal da var – əgər Yunanıstan Argentina yığmasına qalib gələrsə (2-3 top fərqi ilə) və Cənubi Koreya Nigeriyanı4 top fərqi ilə məğlub edərsə, Argentina qrup mərhələsindən çıxmaya da bilər.