"Avropa Oyunlarında ilk qızıl medalı qazanmaq gözəl hissdir"

İsveçrəli dağ velosipedçisi Yolanda Neff bu gün Dağ Velosipedi Veloparkında Bakı 2015 qadınlar arasında dağ velosipedi yarışında qızıl medal qazanaraq tarix yazıb və ilk Avropa Oyunlarının çempionu adına layiq görülüb. Azerisport.az xəbər verir ki, dünya çempionu xanım Neff, Azərbaycanın paytaxtı Bakı şəhərində möhtəşəm Dağ Velosipedi Veloparkında yeddi dairədən ibarət yarışda zəfər qazandıqdan sonra ilk Avropa Oyunlarının çempionu olub.

Avropa Oyunlarının çempionu Yolanda Neff ilə yanaşı İsveçrəli Ketrin Stirnemann və polşalı Maya Vlojovska yarışı müvafiq olaraq ikinci və üçüncü yerdə tamamlamaqla öz adlarını tarixə yazıblar.

İlk Avropa Oyunlarının çempiyonu qızıl medalını Avropa Olimpiya Komitəsinin Prezidenti Patrik Hikkidən qəbul edib və bildirib: “Birinci Avropa Oyunlarında iştirak etmək möhtəşəmdir və ilk qızıl medalı qazanmaq gözəl hissdir. Yarış marşrutu çox küləkli idi. İlk üç dövrədə biz qrup şəklində yarışırdıq və daha sonra mən, sürətimi artırdım və getdikcə rəqiblərimdən daha çox uzaqlaşdım. Həqiqətən çox sevinirəm ki, komanda yoldaşım, isveçrəli Ketrin Stirnemann gümüş medalı və Polşanı təmsil edən yaxın rəfiqəm Maya Vlojovska bürünc medalı qazandı".

Dünyada nömrə bir olan xanım Neff, altı yaşından etibarən yarışır və Bakı 2015 Avropa Oyunlarındakı qələbəsindən öncə 2015-ci ildə səkkiz yarışın qalibi olub.

Bakı 2015 Dağ Velosipedi Veloparkı Azərbaycanda ilk dəfə bu məqsəd üçün tikilmiş Dağ Velosipedi məkanıdır. Məkan həmçinin bu gün kişilər arasında birgünlük yarışda mübarizə aparan 77 idmançıya ev sahibliyi edir.