Ledi Qaqa Bakı-2015-in açılış mərasimində çıxış edəcək
Lady Gaga Cümə günü axşam (12 iyun) Bakıda, ilk Avropa Oyunlarının Açılış Mərasimində idmançılar üçün mahnı ifa edəcək. Azerisport.az xəbər verir ki, piano arxasında əyləşərək, Lady Qaqa “İmagine” (Xəyal Et) mahnısını ifa edəcək. Sözləri Con Lennonun (John Lennon) klassik pop mahnısına aid olan bu musiqi parçası dinləyiciləri dünyanı sülh içərisində, sərhədsiz təsəvvür etməyə səsləyir.
Bu mahnı 50 ölkədən, 6000-ə yaxın atleti, idman vasitəsi ilə yeni beynəlxalq həmrəylik məşəli altında toplayan 1-ci Avropa Oyunlarının ruhuna uyğundur.
Lady Qaqa bildirib: “Bakıda Avropa Oyunlarının Açılış mərasimində iştirak etmək, bu gözəl şəhərdə Avropa Oyunlarında mübarizə aparacaq idmançıları salamlamaq mənim üçün böyük bir şərəfdir".
Lady Qaqa reytinq cədvəllərinə liderlik edən “Just Dance” (Rəqs et) və “Poker Face” (“İfadəsiz üz”) hitləri ilə beynəlxalq şöhrət qazandı və 28 miliyon album və 140 miliyon sinql satışı ilə uğurlarını davam etdirdi
O, üç “Grammy” (“Qremmi”) Mükafatı, 13 MTV Video Musiqi Mükafatı, 13 Ginnesin Dünya Rekordu və Mahnı Bəstəkarlarının Məhşurluq Zalı tərəfindən verilən ilk Müasir İkona Mükafatını qazanıb.
Musiqidən başqa, o, lezbiyan, gey, biseksual və transgender (LGBT) şəxslərin hüquqlarının qorunması, QİÇS-lə mübarizə tədbirləri kimi xeyriyyə işlərinə və ictimai fəaliyyətinə görə də məşhurdur. 2012-ci ildə gənclərin inkişafına yardım məqsədilə, “Bu yol üçün addımla” adında xeyriyyə fondu yaradıb.
“Biz çox şadıq ki, Lady Qaqa ilk Avropa Oyunlarının Açılış Mərasimində iştirak edəcək. Con Lennondan ifa edəcəyi “Imagine” adlı mahnı Avropadan gələcək 50 dövlətin idmançıları üçün sülh və birliyin himni olacaq” – Bakı 2015-in Mərasim təşkilatı üzrə direktoru Katerina Uqvu müsahibəsində qeyd edib.
