Bakı 2015 çərçivəsində triatlon üzrə ilk məşqlər keçirilib
Bilgəh Çimərliyində Bakı 2015 çərçivəsində triatlon üzrə ilk məşqlər keçirilib. Azerisport.az xəbər verir ki, idmançılardan bəziləri heç də yaxşı start götürə bilməyiblər. Bir neçə idmançı uzun, dayaz bir startdan sonra üzgüçülük bölməsinə daha yaxşı yanaşmanın yollarını axtarıblar.
Güclü irlandiyalı üzgücüsü Russel Vayt hesab edir ki, 186 sm boyunun olması onun üçün bu yarışda üstünlük sayılmayacaq. "Tullanmaq üçün yer çox, üzmək üçün isə yox" - Vaytın ilkin qərarı belə oldu.
Maltanın triatlon idmançısı Daniko Bonello Spiterin boyunun hündürlüyü 153 sm olsa da, o da çətin vəziyyətdə qaldığını etiraf edib: "Yarışdakı üzgüçülük prosesi olduqca qəribədir. Çünki su bir çox hallarda dayazdan dərinə, sonra yenidən dərindən dayaza dəyişirdi. Siz dayazlıqda nə zaman üzmək, nə zaman qaçmaq lazım olduğu barədə düşünməlisiniz. Bu məqamların yarışa necə təsir göstərəcəyini söyləmək çətindir".
Əksər Avropa triatlon idmançıları ponton körpüsündən daha dərin suya tullanırlar. 166 sm boyu olan Yunanıstan idmançısı Ceyms Kronis isə bu halda öz boyundan razı deyildi: "Mən bu üsuldan Avstraliyada çimərlik startları ilə başlayan yarışlarda istifadə etmişəm. Lakin əslində bu, hündürboylu idmançılara daha uyğundur. Onlar bu istiqamətdə daha çox uğur əldə edə bilərlər".
İsveçli məşqçi Fredrik Lundin isə sudan tamamilə razılıq bildirirdi. O, öz yetirməsi, Olimpiya gümüş medalçısı Liza Nordendən bu yarışda böyük uğurlar gözləyir: "Su çox sərindir. Ona görə də suya çoxsaylı tullanışlar etməlisiniz. Bu, sərin bir yarış olacaq. Proses mənim xoşuma gəlir".
Lundin "küləkli şəhər mənasını verən Bakıda hava şəraiti hələ də böyük rol oynayır, şənbə günü hava küləkli olacaq, beləliklə biz ayrı cür proseslə üzləşəcəyik", deyə bildirib.
Triatlon üzrə qadınların yarışı şənbə, 13 iyuna, kişilərin yarışı isə 14 iyuna planlaşdırılır.
