"Avropa Oyunları hər kəs üçün yaddaqalan təcrübə olacaq"
Hakala Bakı 2015-də Finlandiyanı təmsil edəcək voleybol komandasının baş məşqçisi təyin edilib. Azerisport.az xəbər verir ki, o, Finlandiyanın kişilərdən ibarət voleybol komandasını Bakı 2015-ə hazırlayacaq.
32 yaşlı Hakala 2014-cü ildə Sloveniya milli komandası məşqçisinin köməkçisi olaraq çalışdıqdan sonra ilk dəfə Finlandiya milli komandasının başına keçdi. O, həmçinin bu mövsüm Finlandiyanın LEKA Volley klubuna da məşqçilik edib.
"Laurinin beynəlxalq təcrübəsi, şübhəsiz ki, böyük üstünlükdür. O həmçinin son illərdə çox dəyişib". Bunu komandadan ayrılan məşqçi Pertti Honkanen ümumilikdə yeddi ölkədə oynamış və məşqçilik etmiş Hakala haqqında deyib.
Hakala Bakı 2015 Avropa Oyunlarında evsahibi Azərbaycan, Serbiya, Polşa, Fransa və Türkiyə ilə birgə A qrupunda çıxış edəcək Finlandiya komandasına başçılıq edəcək. B qrupu isə Rusiya, İtaliya, Bolqarıstan, Almaniya, Belçika və Slovakiya komandalarından təşkil olunub.
Hakala komandasının Finlandiyanı təmsil etmənin əslində nə demək olduğunu anlamasına kömək edəcəyinə ümid edir. "Onlar bütün güclərini komandanın uğuruna yönləndirməli və komanda uğurunun əsasında nəyin dayandığını yaxşı başa düşməlidirlər. Əlbəttə ki, müxtəlif təcrübə və yaşlardan idmançıların bir arada olmasının da müsbət rolu olacaqdır, " - deyə Hakala baş məşqçi təyin olunmasına münasibət bildirərkən qeyd edib.
Onun sözlərinə görə, Bakı 2015 eyni zamanda oyunçuların bəziləri üçün əvəzolunmaz təcrübə olacaq: "Bakı 2015 Avropa Oyunları yeni oyunçularımızın bacarıqlarını göstərməsi baxımından mükəmməl imkandır və bu, hər kəs üçün yaddaqalan təcrübə olacaq".
Hakalanın Bakı 2015 Avropa Oyunlarında iştirak edəcək komandanın tərkibini 4 may tarixində açıqlaması gözlənilir.
