Macarıstan Bakı 2015-də avarçəkmə medallarını qazanacağına ümid edir
Macarıstanın Olimpiya liderləri idmançılarının xüsusilə Bakı 2015 yarışlarında avarçəkmə üzrə güclü nəticələr göstərəcəyinə ümid edirlər. Azerisport.az xəbər verir ki, Macarıstan Olimpiya Komitəsinin (MOK) prezidenti cənab Zsolt Borkai komitənin internet səhifəsinə verdiyi müsahibədə deyib ki, o, Macarıstan idmançılarının Bakı 2015 Avropa Oyunlarında maksimal nəticə göstərəcəklərinə ümidlidir.
“Biz heç vaxt taktika işlətmirik. Biz var gücümüzlə mübarizə aparırıq. Biz Bakı 2015 Avropa Oyunlarına bu əhval-ruhiyyə ilə hazırlaşırıq” – deyə cənab Borkai bildirib.
Prezident Macarıstanın Bakı 2015 oyunlarında avarçəkmə üzrə yüksək nəticə göstərəcəyindən əminliyini bildirib: “Avropa Oyunlarında avarçəkmə yarışları Dünya Çempionatlarında Olimpiya Oyunlarına təsnifat hazırlıqlarına tamamilə uyğun gəlir. Bakıda bizim güclü komandamız yarışacaq”.
Macarıstan Olimpiya tarixində ümumən 77 medal qazanıb ki, bunun da 22-si qızıl medaldır. Bu ölkə avarçəkmə yarışlarında ən çox medal qazanan ölkələrdən biridir və Sovet İttifaqından (29) və Almaniyadan (28) sonra üçüncü yeri tutur. Macarıstan artıq Bakı 2015 Avropa Oyunlarında 143 idmançınn iştirak edəcəyini təsdiq edib. Bu rəqəmin Bakı 2015 Oyunları başlayanadək 200-ə çatacağı gözlənilir.
2015 Oyunları Rio 2016 Olimpiya Oyunları üçün təsnifat xarakteri daşıdığından cənab Birkai Bakı 2015-ə xüsusi diqqət yetirildiyini söyləyib: “Biz Avropa Oyunlarına xüsusi önəm veririk, belə ki bu, Avropa Olimpiya Hərəkatının çoxşaxəli idman tədbiridir”. O, belə əlavə edib: “Əminəm ki, Azərbaycan həqiqətən də Olimpiadaya layiq şəkildə bir tədbir keçirəcəkdir. Bizim üçün Bakı, 2016 Olimpiya Oyunlarına əlavə məşq olacaqdır”.
Macarıstanın İdman və Gənclər üzrə dövlət katibi cənab İstvan Simicsko Avropanın qitədə çoxşaxəli idman tədbirinə start verməsinin müsbət hadisə olduğunu bildirib. O, Avropa Oyunlarının öz rolunun öhdəsindən şərəflə gələcəyinə inanır.
Cənab Simicsko inanır ki, həmvətənləri Bakıda möhtəşəm çıxış nümayiş etdirəcəklər: “Heç şübhəm yoxdur ki, Macarıstan atletləri Rio Olimpiya oyunlarından bir il əvvəl keçirilən Bakı yarışlarında ənənəmizə sadiq qalaraq çıxış edəcəklər”.
