Olimpiya çempionu Bakı-2015-in qonağı oldu
Dünən Bakı 2015 Avropa Oyunları Azərbaycana səfər etmiş Rusiyanın güləş üzrə əfsanəvi idmançısı Buvaysar Saytiyevi salamlamışdır. Azerisport.az xəbər verir ki, üç dəfə Olimpiya çempionu olan və sərbəst güləş üzrə dünyanın ən yaxşı idmançısı kimi tanınan Saytiyev Bakı 2015 Avropa Oyunları Əməliyyat Komitəsinin Əməliyyatlar üzrə Baş Direktoru cənab Saymon Kleq ilə görüşmüş və Avropa Oyunlarının baş ofisi ilə tanış olmuşdur.
Eyni zamanda, 6 dəfə dünya və 6 dəfə Avropa çempionu olmuş cənab Saytiyev Bakıya səfərinin bir hissəsi kimi Bakı 2015 Avropa Oyunlarının keçiriləcəyi bir neçə idman obyektinə də baş çəkmişdir.
Cənab Kleq demişdir: “Cənab Saytiyevi burada qəbul etmək və onun gələn ilin yayında keçiriləcək birinci Avropa Oyunlarına ev sahibliyi edəcək obyektlərdən bəzilərinə baş çəkməsi bizim üçün böyük şərəf idi.”
“Güləş Azərbaycanda ən məşhur idman növlərindən biridir və cənab Saytiyev haqlı olaraq güləş əfsanəsi hesab olunur. Ona görə də onun Bakıya səfəri və dünya səviyyəli təcrübəsini komandamız ilə bölüşməsi bizim üçün xoş oldu.”
Cənab Saytiyev 10 ildən artıqdır ki, sərbəst güləş üzrə 74 kq çəki dərəcəsində üstünlüyünü qoruyub saxlamış və 1996-cı il Atlanta, 2004-cü il Sidney və 2008-ci il Pekin Olimpiya yarışlarında çempion olmuşdur.
Rusiyanın ən çox medalla təltif olunmuş idmançılarından biri olan Saytiyev Rusiya Federasiyasının “Dostluq” Ordeni ilə təltif edilmişdir.
Cənab Saytiyev demişdir: “Bakı 2015 Avropa Oyunlarının baş ofisinə gəlmək və onlardan gələn il keçiriləcək oyunlarla əlaqədar olaraq gedən ən son hazırlıq işləri haqqında eşitmək mənim üçün böyük şərəf oldu.”
“Bütün qitədə qeyd ediləcək birinci Avropa Oyunları böyük tarixi əhəmiyyətə malik yarışlar olacaq və mən həm Rusiyanın, həm də Avropanın elit idmançılarının bu cür möhtəşəm idman obyektlərində yarışacaqlarını səbirsizliklə gözləyirəm.”
Bakı 2015 Avropa Oyunlarında güləş üzrə yarışlar altı gün müddətində keçiriləcək. Heydər Əliyev Arenasında baş tutacaq yarışlarda sərbəst və yunan-Roma güləşi üzrə 480 idmançı 24 medal uğrunda mübarizə aparacaq.
