Bakı-2015 Fransa Milli Olimpiya Komitəsi və Sentez Vousla tərəfdaşlığa başladı
Bakı-2015 Avropa Oyunları böyük məmnuniyyətlə Fransanın Milli Olimpiya Komitəsi və Sentez Vous İdman təşkilatı ilə tərəfdaşlığını elan edir. Azerisport.az xəbər verir ki, Fransada Sentez Vous İdman təşkilatı tərəfindən İdman festivalı təşkil olunur. İdman tədbirinin bayram kimi qeyd edilməsi insanları daha da fəal həyat tərzi sürməyə səsləyir. Sentyabr ayının 13-dən 21-nədək keçiriləcək idman tədbiri bütün Fransanı əhatə edəcək.
Artıq beş ildir ki, ənənəvi olaraq keçirilən tədbir ölkənin Milli Olimpiya Komitəsinin və bütün Fransa idman federasiyalarının dəstəyi ilə məktəblərdə, universitetlərdə və müəssisələrdə baş tutacaq.
Sentez Vous İdman festivalının keçirilməsində məqsəd idmanı sağlam həyat tərzinin bir hissəsi kimi təbliğ etmək və maarifləndirici seminarlar vasitəsilə daha çox sayda insanı müntəzəm fiziki fəaliyyətlər ilə məşğul olmağa həvəsləndirməkdir.
Fransada tədbirlə bağlı bütün kommunikasiya məsələləri, televiziya reklamı, sosial medya və çap məhsulları Bakı 2015 ilə əlaqələndiriləcək.
Festivalda ölkəmizi bu yaxınlarda Nanjinqdə keçirilən gənclər arasında Yay Olimpiya oyunlarında medal qazanmış 6 Azərbaycanlı idmançı təmsil edəcək.
Səid Quliyev (taekvondo-qızıl medal), Teymur Məmmədov, İqbal Hacızadə (güləş-qızıl medal), Cabbar Nəcəfov, Leyla Qurbanova (güləş-gümüş medal) və Nazim Babayev (atletika, 3 təkanla tullanma-bürünc medal) Fransanın Milli İdman və Fiziki Tərbiyə İnstitutuna səfər edəcək və ölkədəki idman tədbirlərində iştirak edəcəklər.
Azərbaycan Respublikasının Gənclər və İdman naziri, Bakı Avropa Oyunları Əməliyyat Komitəsinin (BAOƏK) Baş İcraçı Direktoru cənab Azad Rəhimov qeyd edib: “Sentez Vous İdman tədbirinin keçirilməsində məqsəd çoxlu sayda insanı idmanı həyat tərzlərinin mərkəzi hissəsinə çevirməyə həvəsləndirməkdir.
“Hazırda əhalinin 66%-ni 35 yaşa qədər olan gənclər təşkil edir. Azərbaycanın gənc nəsli idmana çox həvəslidir və biz gələcəkdə bu təşəbbüsü öz ölkəmizdə də təkrar etmək istərdik.”
Festivalda 100-dən artıq idman növü təmsil olunacaq. Tədbirdə ABŞ Milli Basketbol Assosiasiyasının dördqat çempionu, basketbolçu Toni Parker və 2004-cü il Afina Yay Olimpiya Oyunlarında üzgüçülük üzrə qızıl medal qazanmış Lor Manaudou iştirak edəcək.
Kampaniya seminarlar və fəaliyyətlər vasitəsilə insanları yeni idman növləri və fiziki məşqlər ilə tanış edəcək. Ənənəvi festival həftənin müxtəlif günlərində, müxtəlif yaş qrupuna daxil olan insanlar üçün təşkil olunacaq.
Fransa Milli Olimpiya Komitəsinin prezidenti Denis Masseqlia söyləyib: “Biz Bakı 2015-lə əməkdaşlığa məmnunuq və Komitənin dəstəyi ilə Sentez Vous İdman tədbiri xalqımızda idmana marağı artıracaq.”
Bakı 2015 Avropa Oyunları Əməliyyat Komitəsinin Əməliyyatlar üzrə Baş Direktoru cənab Saymon Kleq deyib: “Sözügedən tədbir Bakı 2015 Avropa Oyunlarına qitənin digər tərəfində də idmanı təbliğ etməyə imkan yaradacaq.
“Fransa Avropanın idman sahəsində əsas güc sahibidir və Sentez Vous İdman tədbirinə dəstək göstərməklə Avropa Oyunları Azərbaycanda sağlam həyat tərzi anlayışının əsasını qoyacaq.”
