Formula 1 üzrə Avropa Qran Prisi Azərbaycanda!
Azərbaycan 2016-cı ildə Bakı şəhərində yeni Formula 1® Grand Prix tədbirini keçirmək barədə müqaviləni imzalamaqla, dünya idman səhnəsində özünü bir daha tanıtmağa müvəffəq oldu. "AVROPA FORMULA 1 Qrand-prix" kimi tanınan yarış FİA Formula One World Championship™ təqvimində olan digər marşrutlara rəqib ola biləcək Bakı küçələri ilə, orta əsrlərdən miras qalan İçərişəhərin, müasir göydələnlərin və Xəzər dənizinin möhtəşəm mənzərəsi fonunda baş tutacaq.
Azərbaycanın gənclər və idman naziri cənab Azad Rəhimov qeyd edir: "2016-ci ildə Formula 1 yarışını Bakıya gətirmək üçün müqavilənin imzalanması haqqında rəsmi məlumatı sizinlə bölüşməyimdən çox şadam. Bizim ölkə Şərqi Avropa və Qərbi Asiyanın qovşağında yerləşir ki, bu da Formula 1 yarışları üçün yeni sərhəd deməkdir."
"Azərbaycan idman mükəmməliyi mərkəzi kimi şöhrət qazanmış müasir Avropa ölkəsidir. Formula 1 yarışının Bakıda keçirilməsi üçün əldə olunan razılıq ölkəmizə dünyanın ən böyük idman tədbirlərini cəlb etmək sayəsində davam edən uğurlar sırasında çox əhəmiyyətli yeni bir addımdır", - deyə, o, əlavə edib.
Marşrutun hansı küçələrdən keçməsi üzrə dəqiq dizayn və xəritələrin hələ hazır olmadığına baxmayaraq, nazir Rəhimov start meydançası, əsas tribuna və pit-stop nöqtəsi kimi ehtimala görə Bakının Azadlıq Meydanının seçiləcəyini, yarışın özünün isə Neftçilər prospekti, Hökumət evi və Qız qalası kimi əsas mənzərəli küçələrdən keçəcəyini qeyd etmişdir.
"Bakıda"AVROPA FORMULA 1 GRAND PRIX" yarışının keçirilməsi Formula 1 təqviminə möhtəşəm bir əlavə olacaq. Planlaşdırdığımız dizayn FIA Formula One World Championship təqvimində olan aparıcı küçə sxemlərinə bənzər olacaq," - nazir Rəhimov bildirib.
Azərbaycanın Formula 1® üçün ən möhtəşəm sxem yaratmaq istəyi Formula One şirkətlər qrupunun baş icraçı direktoru Berni Eklestoun tərəfindən də müsbət qarşılanıb.
"Biz Bakının Formula 1 ailəsinə qoşulmasından məmnunuq. Yarış Bakının maraqlı və mənzərəli hissələrindən keçəcək küçə yarışı olacaq. Tədbir Formula 1 yarışının mövcud meyarlarına uyğun olacaq."
2012-ci il Avroviziya mahnı müsabiqəsinə ev sahibliyi üçün inşa edilən Kristal Zalı və Dövlət Bayrağı Meydanını əhatə etməklə, Bakının mənzərəli küçələri ilə qurulan yarış marşrutu üzrə son iki ildə keçirilən tədbirlər nəticəsində Bakı beynəlxalq avtomobil yarışları üzrə üstün təcrübəni artıq toplamışdır.
