30 may 2014 11:33
Gənclərin Avropa Olimpiya Sınaq Yarışları Bakı 2015 Avropa Oyunları üçün ilk sınaq yarışları olacaq
Bakı 2015 Avropa Oyunları bu həftənin sonunda Gənclərin Avropa Olimpiya Sınaq Yarışları (EYOT) həyata keçirilən zaman özünün ilk sınaq yarışlarına ev sahibliyi edəcək.
Üç günlük yarış Cümə günü, may ayının 30-da start götürəcək və Avropanın 700-dən çox ən güclü gənc idmançılarını əhatə edəcək. Atletlər, Tofiq Bəhrəmov adına stadionda qızıl medallar uğrunda yarışacaqlar.
Iştirakçılar yeni inşa olunmuş və gələn ilin yayında ilk Avropa Oyunlarında istifadə olunacaq Atletlər Kəndində qalacaqlar.
Azərbaycan Respublikasının Gənclər və İdman naziri və Bakı Avropa Oyunları Əməliyyat Komitəsinin (BEGOC) baş icraçı direktoru cənab Azad Rəhimov demişdir: “Mən Bakı şəhərinə gələn və Gənclərin Olimpiya Oyunlarında iştirak etmək imkanı qazanmağa çalışan bu gənc idmançıları ürəkdən salamlayıram.
“Gənclərin Avropa Olimpiya Sınaq Yarışları bizim komandamıza gələn ilin Avropa Oyunlarından öncə göstərəcəyimiz bir sıra xidmətləri sınaqdan keçirmək üçün gözəl imkan yaradan möhtəşəm bir tədbirdir”.
Bu ilin avqust ayında Çin Respublikasının Nankin şəhərində keçiriləcək Gənclərin Olimpiya Oyunlarında iştirakını təmin etməyə çalışan 16 və 17 yaşlı idmançılar 36 idman növü üzrə yarışacaqlar.
Tofiq Bəhrəmov Stadionu Bakı 2015 İlk Avropa Oyunlarında kamandan ox atma yarışına ev sahibliyi edəcək.
Bakı Avropa Oyunları Əməliyyat Komitəsinin Əməliyyatlar üzrə baş direktoru Saymon Kleq demişdir: “Avropa Oyunlarında yarışlara ev sahibliyi edəcək hər bir obyekt gələn ilin yay aylarına kimi ətraflı şəkildə sınaqdan keçiriləcək, belə ki, biz bütün Avropanın iştirak etməyə can atacağı bir yarışın həyata keçirilməsi üçün hazırlıq işlərimizi davam etdiririk.
“Gələn ilin yayında keçiriləcək Oyunlarda 6,000-dən çox atletə ev sahibliyi etməyə hazırlaşdığımız üçün yarış iştirakçılarının Atletlər Kəndində qalmasına imkan yaradılması da bizim üçün əhəmiyyətli bir məsələdir”.
Azərbaycan Atletika Federasiyasının prezidenti Çingiz Hüseynzadə demişdir: “Atletika üzrə yeniyetmələr arasında Avropa təsnifat turnirinin Azərbaycanda keçirilməsindən qürur hissi duyuram.
Yerli Təşkilat Komitəsinin üzvləri də Avropanın ən güclü gənc idmançılarını Bakıda salamlamaqdan məmnundurlar.
“Möhtəşəm atletika yarışının uğurla həyata keçməsi üçün bu istiqamətdə biz BEGOC-un dəstəyi ilə əzimlə çalışırıq”.
Gənclərin Avropa Olimpiya Sınaq Yarışlarında səhər sessiyaları saat 9:30-da və günorta sessiyaları isə cümə günü, may ayının 30-da saat 15:00-da və şənbə günü, may ayının 31-də saat 15:30-da başlanacaq. Bazar günü, iyun ayının 1-də səhər sessiyası olmayacaq və bu zaman günorta sessiyası saat 14:00-da başlanacaq.
Gənclərin Avropa Olimpiya Sınaq Yarışlarının açılış mərasimi cümə günü, may ayının 30-da saat 17:00-da Tofiq Bəhrəmov Stadionunda keçiriləcək.
Qeyd edək ki, Bakı2015 İlk Avropa Oyunları 2015-ci il iyun ayının 12-dən 28-nə qədər keçiriləcək və qitə üçün çox maraqlı, cəlbedici, proqressiv yeni multi-idman yarışları olmaqla yanaşı indiyədək görülməmiş ilk Avropa Oyunları kimi tarixə düşəcək.
Bakı 2015 İlk Avropa Oyunları ümumilikdə 19 idman növünü əhatə edəcək: 16 Olimpiya idman növü və 3 qeyri-Olimpiya idman növü. 17 yarış günü ərzində 6000-dən çox idmançının öz ölkəsini təmsil edəcəyi gözlənilir.
İdman növlərinin 9-u 2016-cı ildə keçiriləcək Rio De Janeyro Yay Olimpiadası üçün kvalifikasiya imkanları yaradacaq. Sözügedən idman növlərinin sırasına kamandan ox atma, atletika, çimərlik voleybolu, velosiped idmanı, atıcılıq, üzgüçülük, stolüstü tennis, taekvondo və triatlon daxildir.
Avropa Oyunlarının keçirilməsi Bakı şəhərinə Avropa Olimpiya Komitələri (EOC) tərəfindən 2012-ci ilin dekabr ayında həvalə olunmuşdur. Bakı Avropa Oyunları Əməliyyat Komitəsi (BEGOC) Oyunları EOC ilə əməkdaşlıq şəraitində təşkil edərək həyata keçirəcəkdir.
