11 dekabr 2013 17:13
Bakı-2015-ə qədər qılıncoynatma üzrə baza tikilə bilər
Bu yaxınlarda Beynəlxalq Qılıncoynatma Federasiyası 100 illik yubileyini qeyd edib. Parisdə təşkil olunmuş mötəbər tədbirə bizdən AQF-in 1-ci vitse-prezdenti Yaşar Məmmədov dəvət olunub. Bu barədə məlumatı azerisport.az saytının əməkdaşına təcrübəli mütəxəssisin özü verib və bildirib ki, o, toplantıya qatılan yeganə azərbaycanlı olmayıb:
“Beynəlxalq Qılıncoynatma Federasiyası 100 illik yubileyinə İlqar Məmmədov da dəvət almışdı. Onu 2-qat olimpiya çempionu olaraq çağırmışdılar. Oğlumu Fransa paytaxtında həyat yoldaşı Yelena Jemayeva müşayiət etmişdi. Məlum məsələdir ki, milli komandamızın keçmiş üzvü 1999-cu ildə sablyaçı qadınlar arasında ilk dünya çempionu kimi tarixə düşüb. O, həmin il Dünya Kubokunu və Avropa çempionluğunu da qazanmışdı.
Tədbir çərçivəsində, Beynəlxalq Qılıncoynatma Federasiyasının Konqresi də keçirildi. Toplantıda 149 ölkənin nümayəndəsi qatılmışdı. Növbəti gündə gəmi ilə Sena çayı üzərində səyahət etdik. Səfərin finalında Parisin məşhur “Qrand Plaza”sında 1000 nəfərin iştirakı ilə böyük ziyafət təşkil olundu. Həmin qonaqlığda BOK-un yeni prezidenti Toma Bax da iştirak edirdi. Bildiyimiz kimi, o, qılıncoynatmanın rapira növündə Monreal-1976-nın qalibidir”.
Qeyd edək ki, İlqar Məmmədov hazırda Rusiyanın kişilərdən ibarət yığma komandasının baş məşqçisidir. Onun həyat yoldaşı Yelena Jemayeva isə, bu ölkənin qadın sablyaçılar arasından millisində çalışır.
Yaşar Məmmədov onu da əlavə edib ki, dünən “Fairmont” mehmanxanasında Bakı Avropa Oyunları Əməliyyat Komitəsinin toplantısı keçirilib. Yığıncaqda Bakı-2015-in proqramına daxil olunan idman federasiyalarının rəhbər nümayəndələri iştirak ediblər. İclasda əsas müzakirə mövzusu 1-ci qitə olimpiadasına hazırlığı gedişi olub.
Təcrübəli mütəxəssis bildirib ki, bu günlərdə federasiyanın prezidenti Nazim İbrahimovla görüşəcək. Ola bilsin, Bakı-2015-ə qədər qılıncoynatma üzrə baza tikilsin.
