26 noyabr 2013 18:00
"Olimpiadaya yeddi il hazırlaşırlar, ancaq bizim iki il yarım vaxtımız var"
Məşhur idman rubrikaçısı britaniyalı Alan Habbard 2015-ci ildə Bakıda keçiriləcək Avropa oyunlarına növbəti məqaləsini həsr edib. Azerisport.az Habbardın məqaləsini oxucuların diqqətinə çatdırır.
“Bakı. Bu, quş, təyyarə, Pleysteyşndə yeni bir oyun və ya yapon restoranında suşi ilə birgə nə isə sifariş verə biləcəyiniz bir şeydirmi?
Əlbəttə, idman həvəskarlarının əksəri beynəlxalq olimpiya hərəkatında Azərbaycan paytaxtının iddialı oyunçu olduğunu bilir.
Bu dörd hərf tezliklə bütün dünyanın idman lüğətində məşhur olacaq. Belə ki, iri yarışların təşkilatçıları təravətli, qonaqpərvər məkan axtarışındadır.
Bunlardan biri 2015-ci ildə Bakıda keçiriləcək Avropa oyunları olacaq.
Yaxın Şərqin bir çox şəhərlərindən fərqli olaraq, Bakı, demək olar ki, ilin istənilən fəslində özünün mülayim iqlimi ilə fərqlənir. Şəhərin əksər əhalisini müsəlmanlar təşkil edir. Ancaq cəmiyyət dünyəvidir. Dövlət öz vətəndaşlarına məzhəb azadlığını təmin edir.
Lonely Planet görə, Bakı gecə həyatının fəal olduğu on şəhər siyahısına daxildir. Məsələn, Las-Veqas bu siyahıda yoxdur”.
“Bu şəhərdə Oyunları qəbul etmək böyük çağırışdır. Biz Avropa Olimpiya Komitəsinin keçən ilin dekabrında təsdiq etdiyi çox sıx təqvim üzərində işləyirik. Olimpiadaya yeddi il hazırlaşırlar, ancaq bizim Avrooyunlara hazırlaşmaq üçün iki il yarım vaxtımız var. Bu, Asiya və ya Panamerika oyunlarındakı modeli xatırladır”, deyə Avrooyunların mətbuat və ictimaiyyətlə əlaqələr sədri Derril Saybl bildirib.
Onun sözlərinə görə, layihə üzərində London Olimpiadasının təşkilatçıları çalışır. “Arenalar, nəqliyyat, məntiq, yerləşdirmə - bunlar London Olimpiadasını fərqləndirən cəhətlər idi. Həmin şeylər Bakıda da olacaq”, deyə Saybl əminliyini dilə gətirib.
“Bakı fantastik yer, daim inkişaf edən şəhərdir. Biz burada çoxlu vaxt keçirəcəyik”, deyə Saybl fikrini tamamlayıb.
