21 noyabr 2013 12:48
Bakı-2015-in nümayəndə heyəti AOK Baş Assambleyasında
22-23 noyabrda İtaliyanın paytaxtı Roma şəhərində Avropa Olimpiya Komitəsinin (AOK) 42-ci Baş Assambleyası keçiriləcək. Azerisport.az xəbər verir ki, toplantıda Milli Olimpiya Komitəsinin (MOK) vitse-prezidenti Çingiz Hüseynzadə, Gənclər və İdman Naziri Azad Rəhimov, MOK-un Beynəlxalq Əlaqələr İdarəsinin rəisi Könül Nurullayeva, Bakı-2015 Avropa oyunlarının əməliyyat şirkətinin İcraçı direktorunun müavini Cim Şerr, idman şöbəsinin müdiri Pyers O’Kallaqan, idmançılara xidmət və əməliyyat şöbəsinin müdiri Ceyms Malleod, baş məsləhətçi Duq Arnot və digərləri iştirak edəcəklər.
Assambleya seçki xarakteri daşıyacaq və 2 gün davam edən tədbirdə həmçinin AOK-un prezidenti, vitse-prezidenti, baş katibi və İcraiyyə Komitəsinə seçkilər keçiriləcək.
Tədbir zamanı Avropanın kiçik dövlətlərinin iştirakı ilə keçirdiyi XV Oyunlarının hesabatı, Avropa Gənclərinin Olimpiya Festivallarının XI Qış və XII Yay buraxılışlarına dair yeniliklər, Soçi-2014 Qış Olimpiya Oyunları, Rio-2016 Yay Olimpiya Oyunları, Pyeonçang 2018 Qış Olimpiya Oyunları və 2020-ci ildə Tokioda keçiriləcək XXXII Yay Olimpiya Oyunları haqda təqdimatlar ediləcək.
Onu da qeyd etmək lazımdı ki, 23 noyabrda Avropa oyunları ilə bağlı AOK-un əlaqələndirmə komissiyasının rəhbəri Spiros Kapralos, onun müavini Zlatka Matesanın iştirakı ilə Bakı-2015-in əməliyyat şirkətinin nümayəndələri tərəfindən təqdimat olacaq.
Azad Rəhimov, Könül Nurullayeva və Cim Şerr Azərbaycan paytaxtının oyunlara son hazırlıq durumu ilə bağlı məruzə ilə çıxış etməklə yanaşı, Milli Olimpiya Komitələrini maraqlandıran suallara cavab verəcəklər.
