27 oktyabr 2013 12:31
Yaşar Bəşirov: Avropa oyunlarında minimum bir qızıl medal qazanacağıq
WKF növündə çıxış edən karateçilərimiz üçün cari mövsüm çox uğurlu keçib. Seçmə komandamız bir neçə mötəbər yarışda Vətənə böyük qələbə ilə dönüb.
Amma qarşıda kimono ustalarımızı daha ciddi sınaq gözləyir. Bu, Bakıda keçiriləcək 1-ci Avropa oyunlarıdı. Qeyri-olimpiya idman növü olan karatenin “dördilliy”in proqramına salınması şərq döyüşçülərimizi çox sevindirir.
Azerisport.az saytına müsahibəsində Milli Karate Federasiyasının prezidenti Yaşar Bəşirov sözügedən uğurlardan danışıb, yığma komandanın gələcək planlarını açıqlayb:
- Bu günlərdə Sankt-Peterburqda keçirilmiş Döyüş idman növləri üzrə dünya oyunlarında iştirak etdik. Nəticəmiz çox uğurlu oldu. Gözləmədiyim halda, idmançımızın hər ikisi qızıl medal qazandı.
Rafael Ağayevin fərqlənəcəyinə əmin idim. Amma Şahin Atamovun fəxri kürsünün ən yüksək pilləsinə çıxmasını ehtima etmirdim. O, müsbət 94 kq-da çıxış edirdi. Bu çəkidə uğur qazanmaq asan deyil. Sevindiricidi ki, Atamov ötən ay İndoneziyada keçirilmiş İslam olimpiadasında finalda uduzduğu idmançıya, bu dəfə həlledici döyüşdə qalib gəldi.
- İslam oyunlarından söz düşmüşkən, karateçilərimiz bu mötəbər yarışda da yüksək səviyyədə çıxış etdilər. Demək, cari mövsüm sizlər üçün uğurlu keçib.
- İslam olimpiadasında həm komanda, həm də şəxsi yarışda qızıl medal qazandıq. Sevinirəm ki, bu oyunlarda ümumi hesabda qənaətbəxş yer tutmağımızda karateçilərin də böyük payı oldu.
- Karatenin WKF növü 2015-ci ilə Bakıda keçiriləcək ilk Avropa olimpiadasına salınıb. Bu, olimpiya millimizin yüksək yerlər tutması imkanını artırır; karateçilərimizi daha məsuliyyətli olmağa vadar edir. Komandanın vəzifəsinin öhdəsindən layiqincə gəlməsini istiqamətində hansı yeni planınız var?
- Bəli, bizim qarşımıza tapşırıq qoyulub və biz bu məsuliyyəti dərk edirik. Ölkə başçısı cənab İlham Əliyevlə görüşərkən, o, məndən soruşdu ki, Yaşar Bəşirovun rəhbərlik etdiyi federasiya hansı nəticəni verə bilər? Mən də, cavabımda, “Allah qoysa, minimum bir qızıl medal qazanacağıq”, söylədim. Niyə də, əmin olmayım! Azərbaycanın Rafael Ağayev kimi dünyada “bir nömrə”li karateçisi var.
- Yaşar müəllim, uğur qazanmaq çətindisə, onu qorumaq ondan da çətindi. Karate komandamız dünyada favoritlərdən sayılır. Amma idmanın eniş-yoxuşu da olur. O vaxta qədər belə yüksək tempdə qala biləcəksinizmi?
- Bu zirvədə qalmaq üçün, yüksək səviyyədə qayğı da lazımdı. Belə dəstəyi bizə Beynəlxalq bank göstərəcək. İnanıram ki, sonda vəzifəmizin özdəsindən gələcəyik.
- Sizin üzv olduğunuz beynəlxalq federasiyanın olimpiya proqramına salınması ehtimalı qalır. Maraqlıdı, bu istiqamətdə indi vəziyyət necədi?
- İlk addım atıldı: WKF növü ilk Avropa oyunlarının proqramına daxil edildi. Ola bilsin, 2020-ci ildə yaponlar bir daha cəhd etdilər. Bizim inam həmişə qalır.
