28 may 2013 01:37
Avropa çempionatında səkkiz medal və dünya rekordu!
18-25 may 2013-ci il tarixində Türkiyə Respublikasının Quşadası şəhərində 23-ci kişi və 21-cu qadın Usta ağır atletləri arasında Avropa çempionatı başa çatıb. Azerisport.az xəbər verir ki, 27 ölkənin 300-dən çox atletinin iştirak etdiyi Avropa çempionatında Azərbaycan 2 qadın və 8 kişi veteran idmançısı ilə təmsil olunub.
Qadınlardan Şahverdi Xatirə 45-49 yaş qrupunda 63 kq çəki dərəcəsində ikinci yeri (32+45=77 kq), Rzayeva Səbinə 35-39 yaş qrupunda 69 kq çəki dərəcəsində birinci yeri (60+75=135 kq) tutub.
Kişilərdən isə Jilyayev Vladimir 65-69 yaş qrupunda 85 kq çəki dərəcəsində birinci yerə çıxıb. O, birdən qaldırma hərəkətində isə 117 kq çəkinin öhdəsindən gələrək yeni dünya rekordunu müəyyənləşdirib (85+117=202 kq).
Alıyev Akif 50-54 yaş qrupunda 56 kq çəki dərəcəsində (70+80=150 kq), Əliyev Emil isə 35-39 yaş qrupunda 105 kq çəki dərəcəsində birinci yeri (150+167=317 kq) tutub.
Hümbətli Aftandil 35-39 yaş qrupunda 69 kq çəki dərəcəsində gümüş medal qazanıb (102+129=231 kq).
Əliquliyev Teymur 45-49 yaş qrupunda 85 kq çəki dərəcəsində (93+121=214 kq), Ağayev Natiq isə 45-49 yaş qrupunda 105 kq çəki dərəcəsində (101+115=216 kq) üçüncülüklə kifayətlənib.
Ağayev Namiq 45-49 yaş qrupunda 77 kq çəki dərəcəsində 5-ci yerlə kifayətləndiyi halda, Məmmədov İltifat 45-49 yaş qrupunda 94 kq çəki dərəcəsində uğursuzluqla üzləşib.
Beləliklə, veteran ağır atletlərimiz Avropa çempionatında 4 qızıl,2 gümüş və 2 bürünc medal əldə ediblər.
