8 may 2013 14:12
Azərbaycan DÇ-də daha bir medal qazandı (FOTO)
Perunun Lima şəhərində ağır atletika üzrə gənclər arasında Dünya birinciliyi tam sürətlə davam edir. Azerisport.az xəbər verir ki, Azərbaycan milli komandasının üzvlərindən qızıl medal qazanmış Valentin Xristov (62 kq) və bürünc medal qazanmış Firudin Quliyevdən (69 kq) sonra körpücükü üzərinə daha iki idmançımız çıxıb.
Elxan Əliquluzadə və Nicat Rəhimov 77 kq çəki dərəcəsində qüvvələrini sınayıblar.
Yarış milli komandamız üçün uğurlu başlamayıb. Birdən qaldırma hərəkətində əvvəlcə 140 kq-ın öhdəsindən gələn Elxan Əliquluzadə, sonrakı yanaşmalarda 145 və 147 kq çəkili ştanqı ram edə bilməyib. Birinci yanaşmadan sonra aldığı zədə idmançımıza bu hərəkətdə ancaq 7-ci olmaq imkanı verib. Ancaq ağrılar üzündən təkanla qaldırma hərəkətinə çıxa bilməyən Elxan, yarışı yarımçıq bitirmək məcburiyyətində qalıb.
Ancaq gün Azərbaycan komandası üçün uğurla sona çatıb. Yeniyetmələr üzrə ilk Olimpiya çempionumuz Nicat Rəhimov, gümüş medal qazanaraq bizləri sevindirib.
Birdən qaldırma hərəkətində 153 kq-ı iki cəhddə ram edən Rəhimov, üçüncü yanaşmasında 158 kq sifariş verib. Ancaq onu ram edə bilməyib. Buna baxmayaraq, Nicat bu hərəkətdə 3-cü yeri tutub.
Təkanla qaldırma hərəkətində isə idmançımız nisbətən yaxşı çıxış edib. Əvvəlcə 185, sonra isə 187 kq çəkini başı üzərinə qaldıran Rəhimov, son yanaşmasında 192 kq-la çempionluq cəhdi edib. Ancaq bu cəhdi uğurlu alınmayıb. Buna baxmayaraq, Nicat Rəhimov bu hərəkətdə ikinci ola bilib.
Toplamda 340 kq (153 kq + 187 kq) nəticə ilə Nicat Rəhimov gənclər arasında dünya çempionatının gümüş medalına sahib çıxıb.
