4 iyun 2013 16:15
Yeni reytinq cədvəli açıqlandı
Beynəlxalq Atıcılıq Federasiyası (İSSF) iyun ayı üçün reytinq cədvəlini açıqlayıb. Azerisport.az xəbər verir ki, yeni siyahıda aparıcı snayperlərimiz bir məsafədə mövqelərini yaxşılaşdırdıqları halda digərində geriləyivlər.
Belə ki, güllə atıcılarımızdan Olimpiya mükafatçımız İradə Aşumova 10 metr məsafəyə atəş açmada 21 pillə irəli gedərək, 41-ci yerə yüksəlib. O, əvəzində 25 metr məsafədən atəşaçanlar arasında 8 rəqibini özündən qabağa buraxıb (45-ci yer).
Ruslan Lunyov isə 10 metr və 25 metr məsafələrə atəş açmaqda irəliləyib. O, siyahıda müvafiq olaraq, 44-cü (+37) və 21-cidir (+6). Təmsilçimiz 50 metr məsafəyə atəş açmaqda isə 42-ci yeri (-9) tutur.
Stend atıcılarımıza gəlincə, Olimpiya çempionumuz Zemfira Meftahətdinova mövqeyini qoruyub. Skit növündə gücünü sınayan təmsilçimiz yenə 29-cudur. Onun kimi Regina Meftahətdinovanın da mövqeyi dəyişməz qalıb – 52-ci yer. Onlarla müqayisədə, Emin Cəfərov bir rəqibini qabaqlamış və 43-cü yerə yüksəlib.
