7 mart 2014 17:00
Metyu Bremmier Langkavinin Dağ Kralıdır
Malayziyada təşkil olunmuş çoxgünlük “Langkavi” turunda bu gün 9-cu mərhələyə yekun vurulub. Azerisport.az xəbər verir ki, bu mərhələ Azərbaycanın “Synergy Baku” komandası üçün xoş xəbərlə əlamətdar olub.
Belə ki, bu günə qədər dağ mərhələsində göstərdiyi inamlı çıxışla liderliyi ələ keçirən və “qırmızı mayka”nı özündə saxlayan irlandiyalı Metyu Bremmier bugünkü 9-cu mərhələdə də heç kimi özündən qabağa buraxmayıb. Reqlamentə görə, yarışın sabah keçiriləcək sonuncu - 10-cu mərhələsində dağ yollarına görə xalların hesablanmayacağını nəzərə alsaq, Bremmierin ilk pillədə qalacağı dəqiqləşib. Bununla da Azərbaycan komandasının üzvü “Langkavi” turunun “qırmızı mayka”sını və “Dağ Kralı” ləqəbini qazanıb ki, bu da “Synergy Baku” üçün böyük uğurdur. O bu adı və maykanı gələn ilki turnirə qədər özündə saxlayacaq.
Metyu Bremmierin bu uğurunda Azərbaycanın Elit yığmasının üzvü Elçin Əsədovun da böyük rolu var. Belə ki, yürüşün dünən keçirilən 8-ci mərhələsində kifayət qədər inamlı təsir bağışlayan Elçin sprintdəki uğurundan əlavə, dağ mərhələsində Bremmierə xeyli kömək edib və onu arxasınca aparmaqla həm özü 8 xal qazanıb, həm də komanda yoldaşının ən yaxın izləyiciləri ilə xal fərqinin azalmasına imkan verməyib.
Xatırladaq ki, “Synergy Baku”nun digər üzvü Maykl Şvayzer ilin ilk yarışı - Yeni Zelandiyada təşkil olunmuş “Cycle Classic” turunda ən yaxşı sprinter kimi “yaşıl mayka”ya layiq görülmüşdü.
111 km-dən ibarət 9-cu mərhələdə digər velosipedçilərimizin nəticələrinə gəlincə, almaniyalı Daniel Klemme, həmvətənlərimiz Elçin Əsədov və Tural İsgəndərov, irlandiyalı Metyu Bremmier və avstraliyalı Patrik Leyn mərhələ qalibi ilə eyni göstəriciyə imza atıblar - 2 saat, 32 dəqiqə, 21 saniyə. Fotofinişə əsasən Daniel Klemme hamıdan öndə, 9-cu yerdə qərarlaşıb.
Sabah keçiriləcək sonuncu, 10-cu mərhələdə iştirakçılar 103 km məsafə qət edəcəklər.
(AVİF mətbuat xidməti)
