24 fevral 2014 18:33
Synergy Bakunun Tour de Langkawi heyəti
Azərbaycanın ilk peşəkar velosiped komandası “Synergy Baku”nun üzvləri Elçin Əsədov və Tural Isgəndərov fevralın 27-də Malaziyada start götürəcək Beynəlxalq Velosipedçilər Ittifaqının (UCİ) 2.HC kateqoriyalı “Langkawi” turunda iştirak edəcəklər. Azerisport.az xəbər verir ki, 10 mərhələdən ibarət yarışda yüksək yerlərə iddia edən velosipedçilərimiz bundan öncə Avstraliyada mübarizə apardıqları “Herald Sun Tour” yürüşü ilə bağlı fikirlərini bölüşüblər.
Azərbaycanın Elit yığma komandasının da şərəfini qoruyan 27 yaşlı Elçin Əsədov soyuqdəymə səbəbindən Avstraliya turunun ilk mərhələsində istədiyi kimi çıxış edə bilmədiyini deyir: “Tibbi personalımızın köməkliyi sayəsində tez sağaldım və mümkün qədər komandaya kömək etməyə çalışdım. Mənim üçün əsas olan məşqçilərin tapşırığını həyata keçirmək idi ki, bu işin öhdəsindən gəlməyə cəhd göstərdim. “Langkawi” turuna gəlincə, bu Asiyada ən çətin yarışlardan biridir. 10 gün ərzində mənə nə tapşırılacaqsa, onu da etmək üçün mübarizə aparacam”.
Elçin Əsədov 2014-cü ildə qarşısına qoyduğu hədəflər haqqında da danışıb: “Mayda ölkəmizdə keçiriləcək “Tour d”Azerbaidjan” veloyürüşünün bir mərhələsinin qalibi olmağı çox istəyirəm. Bundan başqa, bu ilin sentyabrında Ispaniyada keçiriləcək dünya çempionatında da uğurla çıxış etməyi arzulayıram” - deyə, Elçin bildirib.
Azərbaycanın U-23 milli komandasının üzvü, 22 yaşlı Tural İsgəndərov isə Avstraliya turundakı çıxışına bir qədər tənqidi yanaşır: “Düzdür, iqlim dəyişikliyi və havanın isti olması mənə müəyyən problemlər yaratdı, amma bu qətiyyən bəhanə olmamalıdır. Əgər dağ mərhələsində mövqeyimi düzgün seçsəydim, yəqin daha yaxşı nəticə qazana bilərdim. O ki qaldı “Langkawi” turuna, oradakı məqsədim məşqçilərin tapşırığına əsasən dəyişə bilər”.
Əsas hədəfinin komandaya fayda vermək olduğunu deyən Tural, həm “Synergy Baku”nun, həm də milli komandanın heyətində iştirak etdiyi yarışlarda qələbə üçün əlindən gələni edəcəyini sözlərinə əlavə edib.
Yeri gəlmişkən, fevralın 27-də start götürəcək 10 mərhələli “Langkawi” turunda iştirakçılar 1495 km məsafə qət edəcəklər. Elçin Əsədov və Tural İsgəndərovdan başqa “Synergy Baku”nun heyətində bu yarışda Daniel Klemme, Maykl Şvayzer, Patrik Leyn və Metyu Bremmier də mübarizə aparacaq.
(AVİF)
