26 sentyabr 2013 14:54
Azərbaycan Velosiped İdmanı Federasiyası qızları bu idman növü ilə məşğul olmağa dəvət edir
Azərbaycan Velosiped İdmanı Federasiyasının rəhbərliyi idmanın bu növünü ölkəmizdə inkişaf etdirmək üçün son illər böyük işlər görür. Azerisport.az xəbər verir ki, Azərbaycanda ümummilli lider Heydər Əliyevin xatirəsinə həsr olunmuş beynəlxalq “Tour d'Azerbaidjan” veloturu artıq iki dəfə yüksək səviyyədə keçirilib.
İdmanın bu növünü inkişaf etdirmək üçün məktəb və klublar yaradılır, maddi-texniki baza möhkəmləndirilir. “Synergy Baku Cycling Projekt” komandası yaradılmışdır və bu komanda artıq beynəlxalq miqyasda müvəffəqiyyətlə çıxış edir.
Federasiyanın meneceri, qadınlardan ibarət komandanın məşqçisi Elnarə Musayeva deyib ki, Olimpiya Oyunlarında oynanılan 18 dəst medalın yarısı qadınların payına düşür. “Sovet dövründə Azərbaycanda qadınlar üçün güclü velosiped idmanı məktəbi fəaliyyət göstərib. Amma təəssüf ki, indi bununla öyünə bilmərik. İdmanın bu növü ilə peşəkar səviyyədə məşğul olan qızlarımız azdı. Federasiyanın rəhbərliyi qızların idmanın bu növü ilə məşğul olmasının kütləviliyini artırmaq vəzifəsini qarşıya qoyub. Məlum olduğu kimi, velosiped idmanı dünyada zərif cinsin nümayəndələri arasında da çox populyardı”.
Federasiya 2000-2001-ci illər təvəllüdlü qızları məşğələlərə dəvət edir. Yaşı 22-dək olan qızlar da müraciət edə bilərlər. Federasiya arzu edənlərin hamısını zəruri vasitələrlə təchiz edəcək. Onlar ölkə və şəhər çempionatlarında iştirak edəcəklər. Məşqlər zamanı ən yaxşı nəticə göstərən velosipedçi qızlar dünya və Avropa çempionatlarında, beynəlxalq veloturlarda iştirak etmək üçün seçiləcək. Onlarla peşəkar məşqçilər işləyəcəklər.
