30 iyul 2013 14:41
Belçikada start götürən yürüş iştirakçıları Azərbaycanda! (FOTO)
Xəbər verildiyi kimi, iyulun 1-dən 74 yaşlı belçikalı Kristof Hurtekantın rəhbərliyi altında Belçika, Niderland və İtaliya vətəndaşlarından ibarət bir qrupun Brügge-İstanbul-Bakı marşrutu üzrə velosiped yürüşü başlayıb. Azerisport.az xəbər verir ki, yürüş iştirakçıları Belçikanın Brügge şəhərindən çıxaraq, Almaniya, Avstriya, Macarıstan, Rumıniya, Bolqarıstan, Türkiyə və Gürcüstan ərazilərindən keçməklə iyulun 29-da Azərbaycana çatıblar.
Həvəskar velosipedçilərdən ibarət qrupu Azərbaycan və Gürcüstanın sərhədində - Balakəndəki “Mazımçay” sərhəd-keçid məntəqəsində Azərbaycan Velosiped İdmanı Federasiyasının nümayəndələri, Gənclər və İdman Nazirliyinin məsul nümayəndəsi Ramin Ağamalıyev, rayon icra hakimiyyətinin, Balakən Gənclər və İdman İdarəsinin, mədəniyyət və turizm şöbəsinin əməkdaşları qarşılayıblar.
Milli geyimli qızlar qonaqlara duz, çörək və şərbət təqdim edib və velosipedçilərə Azərbaycan bayrağı verilib. Sonra həvəskar velosipedçilərdən ibarət qrup milli yemək “maxara”ya qonaq edilib.
Qonaqlar təcili yardım və yol polisinin müşaiəti ilə şəhər mərkəzinə gəliblər.
Velosipedçilər iyulun 30-da Şəkiyə yola düşəcəklər.
Yürüş üçün müəyyən edilmiş məsafənin uzunluğu 5555 kilometr təşkil edir. Qrupun avqustun 1-də Bakıya çatması nəzərdə tutulub.
Qeyd edək ki, heyətdə ən yaşlı velosipedçinin 75, ən cavan idmançının isə 52 yaşı var.
