3 may 2013 15:12
Tur de Azerbaijan: Üçüncü gündə üçüncü olduq
“Tur de Azerbaijan” beynəlxalq velosiped turunun üçüncü mərhələsinə start verilib. Azerisport.az xəbər verir ki, 5 mərhələdən ibarət olan yarışın üçüncü hissəsi Qəbələdən başlayıb.
Belə ki, pelaton start nöqtəsindən Oğuzu keçməklə Şəkiyə yollanıb. Velosipedçilər oradan isə yenidən başlanğıc nöqtəyə – Qəbələyə qayıdıb. Yolun məsafəsi 165 km təşkil edib.
Finiş xəttini 165 km məsafəni qət edən ilk idmançı olan Ukraynanın “ISD Continental Team” klubunun üzvü Vitali Popkov keçib. Belçikanın “Lotto-Belisol” klubunun üzvü Stiv Brooks Qəbələyə ikinci çatıb. İlk mərhələnin qalibi olan Azərbaycanın “Synergy Baku Cycling Project”nın klubunun üzvü Kristof Şvaytser bu dəfə 3-cü yerlə kifayətlənib.
Qeyd edək ki, yarışın ilk günündə “Synergy Baku Cycling Project” klubunun üzvü Kristof Şvaytser birinci olmuşdu. Dünən təmsilçilərimizdən Aleksandr Surutkoviç günü ikinci yerdə başa vurmuşdu.
Onu da qeyd edək ki, 25 komandanın iştirakı ilə keçirilən yarışın 4-cü mərhələsi Qəbələdən start götürərək, İsmayıllını keçməklə Şamaxıya yürüş edəcək. İdmançılar 116 km məsafə qət edib, dəniz səviyyəsindən təxminən 1450 m hündürlükdə yerləşən Pirqulu rəsədxanasının yaxınlığında, Vergilər Nazirliyinin Tədris Mərkəzinin qarşısında finiş xəttini keçəcəklər.
146 km uzunluğu olan son mərhələ (5 may) Azadlıq meydanından başlayaraq, Bakının mərkəzi küçələri və prospektlərindən keçərək, Hökumət Evinin qarşısında başa çatacaq.
