27 aprel 2013 00:49
Azərbaycanın “Synergy Baku” klubunun təqdimatı keçirildi
Azərbaycanın "Sinergy Baku Cycling Project" velosiped komandasının təqdimat mərasimi keçirilib. Azerisport.az-ın məlumatına görə, mərasimdə çıxış edən Azərbaycan Velosiped İdmanı Federasiyasının vitse-prezidenti Sahib Ələkbərov bildirib ki, dövlət başçısı, Milli Olimpiya Komitəsinin prezidenti İlham Əliyevin ölkədə idmanın bütün növlərinin inkişafına göstərdiyi diqqət və qayğı nəticəsində velosiped idmanı da son vaxtlar öz dirçəliş dövrünü yaşayır.
O qeyd edib ki, son bir ildə federasiya tərəfindən velosiped idmanının populyarlaşması, onun maddi-texniki bazasının gücləndirilməsi, beynəlxalq əlaqələrin genişləndirilməsi, habelə velosiped idmanının təbliği istiqamətində bir sıra tədbirlər həyata keçirilib. Ələkbərov ölkədə ilk peşəkar velosiped komandası - "Sinergy Baku Cycling Project"in yaradılmasının da bu istiqamətdə görülən işlərin nəticəsi olduğunu deyib.
Ələkbərov deyib ki, klubun yaradılmasında məqsəd beynəlxalq yarışlarda iştirak etməklə Azərbaycan idmanını dünyada daha geniş tanıtmaq və təbliğ etmək, ölkədə velosiped idmanına marağın artırılmasına nail olmaqdır.
Federasiyanın vitse-prezidenti vurğulayıb ki, hazırda qarşıya qoyulan məqsəd 2016-cı ildə Braziliyanın Rio-de-Janeyro şəhərində keçiriləcək Yay Olimpiya Oyunlarında Azərbaycan velosipedçilərinin iştirakına nail olmaq, həmçinin digər beynəlxalq yarışlarda uğur qazanmaqdır: "Azərbaycan velosipedçilərinin ötən il ərzində əldə etdiyi uğurlar bunun üçün ümidvericidir".
Sonra “Synergy Baku Cycling Project” komandasının beynəlxalq yarışlarındakı çıxışından bəhs edən videoçarx nümayiş olunub. Sonda komandanın üzvləri və texniki heyəti ictimaiyyətə tək-tək təqdim edilib. Onlar da komandada yaradılmış şəraiti yüksək qiymətləndiriblər.
