15 oktyabr 2012 17:04
Köhnə velotrek təmirdədi, daha bir velotrek də inşa olunur
Xəbər verdiyimiz kimi, oktyabrın 14-də Gəncə və Naftalan şəhərləri, eləcə də Samux, Goranboy rayonlarının ərazisində çoxgünlü ötüşmələr üzrə velosipedçilərin Federasiya kuboku başa çatıb. Çoxgünlü ötüşmələr üzrə Federasiya kubokunda velosipedçilər dörd mərhələ olmaqla 426 km məsafə qət ediblər. Fərdi və qrup şəklində yarışlara müxtəlif yaş qruplarından olan 50-dək idmançı qoşulub.
4 gün davam edən çoxgünlü ötüşmələr üzrə velosipedçilərin Federasiya kubokunda qaliblər müəyyənləşib. Dörd mərhələnin nəticələrinə görə U-15 yaş kateqoriyası üzrə ötüşmələrdə Maksim Natereskov qalib olub. Tural Xanmedov ikinci, Bakir Dadaşov isə üçüncü yeri tutub. U-17/Gənclər yaş kateqoriyası üzrə ötüşmələrdə Ruslan Hüseynov bütün rəqiblərini qabaqlayaraq turnirin qalibi olub. Xosiauri Dimitriy ikinci (Gürcüstan), Elgün Əlizadə isə üçüncü yerin sahib olub. Elit/U-23 yaş qurupu üzrə Samir Cəbrayılov bütün mərhələlərdə hamıdan çox xal toplayaraq birinci yeri tutub. Aqşin İsmayılov ikinci, Gürcüstan təmsilçisi Georgi Nadiradze isə üçüncü olub.
Beləliklə, ölkəmizdə velosipedin populyarlaşdırılması istiqamətində daha bir turnir başa çatdı. Qeyd edilməlidi ki, 2012-ci ildə ölkəmizdə velosiped idman növünün daha da inkişaf etdirilməsi sahəsində genişmiqyaslı işlərə başlanılıb. Hazırda velosiped idmanının maddi-texniki bazasının möhkəmləndirilməsi, köhnə velotrekin təmiri və yeni bir velotrekin tikilməsi ilə bağlı işlər aparılır.
Velosipedin populyar idman növünə çevrilməsi, kütləviliyinin təmin edilməsi məqsədilə 2012-ci ildə ölkəmizdə beynəlxalq səviyyəli turnir və bölgələrdə yarışlar keçirilib. Ümummilli lider Heydər Əliyevin xatirəsinə həsr edilmiş ilk beynəlxalq velosiped turu Bakı şəhərini və ölkənin regionlarını əhatə etmiş, ilk dəfə olaraq ölkəmizdə 17 ölkədən 20 komandanın iştirakı ilə genişmiqyaslı peşəkar velosiped yarışı təşkil olunmuşdu.
Bundan başqa, Azərbaycan velosipedçilərindən ibarət milli komanda bu il ilk dəfə olaraq Niderlandda təşkil olunan 48-ci Avropa Velosiped Turunda və Avropa çempionatında çıxış ediblər. Milli komandamızın üzvü Elçin Əsədov Azərbaycan müstəqilliyini qazandıqdan sonra ilk dəfə olaraq, velosiped idmanı üzrə dünya çempionatına vəsiqə qazanaraq bu mötəbər turnirdə iştirak etdi.
2012-ci ildə ölkəmizin bölgələrində bir dıra yarışlar, o cümlədən velosiped idmanı üzrə Azərbaycan Çempionatı keçirilib ki, bu da velosiped idmanının daha da inkişaf etdirilməsi və kütləviləşdirilməsi, əhalinin, xüsusilə də gənclərin bu idman növünə olan marağının artmasına təkan verib.
Azərbaycan Velosiped İdmanı Federasiyası
