Avropa çempionu yığmamızdan çəkinir
Zaqrebdə (Xorvatiya) keçirilən yeniyetmə və gənclərin Avropa çempionatında stolüstü tennis üzrə yığmalarımızın uğurlu çıxışı davam edir.
Azerisport.az xəbər verir ki, bunun əsas səbəbi millilərimizdə çinli legionerlərin çıxış etməsidir. Yeniyetmə oğlanlardan ibarət komandada Yanq Vanq - Xinyu Çenxi, yeniyetmə qızlardan ibarət komandada Çen Xingtay - Jou Çuyi, gənc qızlardan ibarət komandada isə Vanq Miao - Ninq Jinq dueti ardıcıl qələbələrdə böyük pay sahibi olublar.
Bu heyət ötən il Avropa çempionu olmuş yeniyetmə qızlardan ibarət Rusiya yığmasını da qorxudub. Qonşu ölkənin komandasının əsas oyunçularından sayılan Kristina Kazansova yığmamızı təhlükəli rəqib görür: "Bu turnirdə oyundan-oyuna daha yaxşı çıxış edirəm. Öz gücümüzə inanırıq. Ancaq bilirik ki, növbəti mərhələlər bizim üçün asan keçməyəcək. Burda çinli oyunçulardan qurulmuş Azərbaycan yığması çıxış edir. Onlar çox güclü və cəlddirlər. Sonuncu dəfə biz onlara uduzmuşuq".
