Sadıq Sadıqov kikboksçularla görüşdü
Xəbər verdiyimiz kimi, Serbiyanın paytaxtı Belqradda keçirilən kikboksinqin WAKO versiyası üzrə XX dünya çempionatına yekun vurulub. Azerisport.az xəbər verir ki, Azərbaycan kikboksçuları çempionatın 7 medalını qazanıblar ki, onlardan da 4-ü "Neftçi İdman Klubu”nun təmsilçilərinə məxsusdur. Anar Məmmədov (51 kq) və Ehram Məcidov (+94 kq) dünya çempionatının gümüş, Çingiz Əhmədzadə (51 kq) ilə Ramiz Məmmədov (54 kq) isə bürünc medalını qazanıblar.
Artıq kikboksçularımız vətənə dönüblər. "Neftçi İdman Klubu” İctimai Birliyi idarəetmə aparatının rəhbəri Sadıq Sadıqov çempionatda böyük uğura imza atmış idmançılarla görüşüb. O, respublikamızda dövlət başçısı tərəfindən aparılan məqsədyönlü idman siyasətindən və Olimpiya Hərəkatı sahəsində görülən işlərdən söhbət açıb. Aparat rəhbəri ölkəmizdə idmanın sürətli inkişaf etməsi sayəsində bir çox mötəbər idman tədbirlərinin, eləcə də ilk Avropa Oyunlarının Azərbaycanda keçirilməsinin respublikamız üçün böyük uğur olduğunu qeyd edib. Natiq klubun yetirmələrinin beynəlxalq arenalardakı uğurlu çıxışlarını və ölkəmizi layiqincə təmsil etmələrini də xüsusi vurğulayıb.
Sonra o, idmançıları qazandıqları yüksək nailiyyət münasibətilə təbrik edib və gələcək yarışlarda onlara uğurlar diləyib.
Ehram Məcidov səmimi görüşə və onlara göstərilən qayğıya görə kikboksçular adından "Neftçi İdman Klubu” İctimai Birliyinin rəhbərliyinə minnətdarlığını bildirib. O, bundan sonra daha da intensiv çalışacaqlarına və beynəlxalq yarışlarda respublikamızın idman şərəfini layiqincə qoruyaraq möhtəşəm qələbələr qazanacaqlarına inandığını söyləyib.
