Avropa çempionatında 5 qızıl medal!
Avropa Taekvondo Birliyinin (ATB) və Türkiyə Taekvondo Federasiyası (TTF) tərəfindən təşkil edilən G1 kateqoriyalı yarış başa çatıb. Azerisport.az xəbər verir ki, Antalyada keçirilən klublar arasında 2-ci Avropa çempionatında ölkəmizi 7 klubdan 53 taekvondoçu təmsil edib. 33 ölkədən 651 idmançının qatıldığı çempionatda klublarımızın taekvondoçuları 5 qızıl, 3 gümüş və 6 bürünc, ümumilikdə 14 medal qazanıb.
Yarışa qatılan idmançılarımızdan Zəlimxan Rəsulov (-63 kq) (Neftçi İ.S.M.), Kamil Adbulrazakov (-59 kq) (Savalan), İlham Əliyev (-45 kq) (Sumqayıt T.İ.M.), İlayda Kardelen (44 kq), Gülhanım Yeşildal (-55 kq) (Gilan) qızıl medal, Radik İsayev (-87 kq) (Gilan), Təhminə Hüseynli (-44 kq) (Sumqayıt Tİ.M), Məmmədəli Quliyev (55 kq) (Neftçi İ.S.M.) gümüş medal, Rəvan Hüseynov (-48 kq) (Sumqayıt T.İ.M.), Rafaella Hüseynova (-59 kq) (Sumqayıt T.İ.M.), Minayə Əkbətova (-33 kq) (Gömrükçü), Əli İsazadə (-45 kq) (Gömrükçü), Məhəmmədyasin İbrahimov (-58 kq) (Savalan), Patimat Abakarova (-49 kq) (Savalan) isə bürünc medala layiq görülüb.
Klublar arasında oğlanlarda Neftçi İ.S.M 2-ci, qızlarda Gilan 2-ci, Sumqayıt T.İ.M isə yarışı 3-cü yerdə başa vurub.
Bir gün sonra isə 28-30 tarıxlərində Dünya Taekvondo Federasiyası (DTF) və Türkiyə Taekvondo Federasiyası (TTF) tərəfində təşkil edilən G1 kateqoriyalı “TURKİSH OPEN”-də, klublardan yalnız Neftçi İ.S.M,Gilan T.K-nın üzvləri Milli komandanın tərkibində qüvvələrini sınayacaq.
