3-cü Azərbaycan çempionatı start götürür
Sabah Bakı Dövlət Cıdır Meydanında Azərbaycan Respublikası Atçılıq Federasiyasının təşkilatçılığı ilə “Çövkən” üzrə 3-cü Azərbaycan çempionatına start veriləcək. Azerisport.az xəbər verir ki, yarış 4 gün davam edəcək.
Azərbaycan Çempionatında May ayında təşkil olunan Azərbaycan Xalqının Ümummilli Lideri Heydər Əliyevin xatirəsinə həsr olunmuş Milli Atüstü Oyunlar Festivalı çərçivəsində keçirilən Çövkən Çempionatında ilk 8 yeri tutmuş komandalar iştirak edəcəklər. Ümumi mükafat fondu 50 min manat təşkil edən yarışda “Sərhədçi” , “Ağcabədi” , “Polad” , “Balakən” , “Ağstafa” , “Ağdam” , “Laçın” , “Şəki” və “Kövsər” komandaları mübarizə aparacaqlar. Bu gün keçirilən püşaktma mərasimindən sonra yarışın təqvimi aşağıdakı kimi müəyyənləşdirilmişdir:
22/10/2014
12:00 – 12:40 “Kövsər” - “Ağdam”
13:00 – 13:40 “Laçın” - “Balakən”
23/10/2014
12:00 – 12:40 “Ağcabədi” - “Polad”
13:00 – 13:40 “Ağstafa” - “Sərhədçi “
24/10/2014
12:00 – 12:40 1-ci yarımfinal oyunu
13:00 – 13:40 2-ci yarımfinal oyunu
26/10/2014
12:00 – 12:40 3-cü yer uğrunda oyun
13:00 – 13:40 FİNAL OYUNU
“Çövkən” oyunu haqda məlumat:
Çövkən oyununda hər komanda 5 oyunçu və 1 ehtiyat oyunçudan ibarətdir. Oyunçulardan 2-si Müdafiəçi, 3-xü isə hücumçu funksiyasını yerinə yetirir. Oyunçular yalnız milli geyimdə olmalıdır. Komandaların geyimləri müəyyən elementlərlə fərqlənməlidir. Görüş hər biri 15 dəqiqə olmaqla 2 hissədən ibarətdir. Qarşılaşmanın 1-ci yarısından sonra komandalar 10 dəqiqə istirahət edirlər. Oyun heç-heçə bitdiyi halda qalib komandanı müəyyən etmək məqsədilə görüşə hər biri 5 dəqiqə olmaqla 2 əlavə hissə, final qarşılaşmasına isə hər biri 10 dəqiqə olmaqla 2 hissə əlavə edilir. Əlavə vaxtda qalib müəyyən olunmadıqda hər komandaya 11 metrlik 5 zərbə təyin olunur. Bu halda yenə hesab heç-heçə olarsa, komandalar ilk itirilən topa qədər zərbələrin vurulmasını davam etdirirlər.
