23 dekabr 2013 12:16
Rəhimovdan daha bir nailiyyət
Atçılığın konkur növü üzrə milli komandanın kapitanı Camal Rəhimov bir neçə ildir ki, Azərbaycanı ölkə hüdudlarından kənarda layiqincə təmsil edir. Azerisport.az xəbər verir ki, 2008-ci il Pekin və 2012-ci il London Olimpiya Oyunlarının iştirakçısı olan idmançı xüsusilə də son illərdə Avropanın bir sıra yüksək səviyyəli turnirlərində ilk onluqda yer alıb.
Eyni zamanda avropada təşkil olunan yüksək kateqoriyalı, yəni 4 və 5 ulduzlu turnirlərdə idmançımızın rəqibləri əsasən dünya sıralamasında ilk 50 yeri tutan idmançılardan ibarətdir.
2013-cü ilin sentyabr ayının əvvələrində İspaniyada keçirilən CSİ5* Gijon turnirində Qran Pri mərhələsini cərimə xalsız başa vurduğuna görə Camal Rəhimov “Warrior” ləqəbli atla 2014-cü ilin Dünya Çempionatına vəsiqəni təmin edib. Qedy edək ki, Dünya Çempionatı 2014-cü ilin Avqust-Sentyabr aylarında Fransanın Normandiya əyalətində keçiriləcəkdir.
21 dekabr 2013-cü il tarixdə idmançımız öz nailiyyətlərinə daha birini əlavə edib. Belə ki, təmsilçimiz İspaniyada keçirilən və hündürlüyü 160 sm olan CSİ5* ən yüksək kateqoriyalı konkur yarışlarının Qran Pri mərhələsində 3-cü yeri tutub. 160 sm – Belə yarışlar üçün beynəlxalq federasiya tərəfindən təyin edilən maksimal hündürlükdür. 32 idmançı arasında iki turdan ibarət yarışların hər iki hissəsini 0 cərimə xalı ilə başa vuran Camal Rəhimov 1-ci və 2-ci yerlərdən vaxta əsasən cəmi 2 saniyə geri qalıb. Dünya sıralamasında ilk 30-luqda yer alan idmançılarla mübarizə aparan idmançı hətta son Olimpiya çempionu Stiv Qerardı da geridə qoyub.
