8 iyul 2013 01:27
Bakıda keçirilən Qrand Prinin qalibləri müəyyənləşdi
İyulun 7-də Bakıda motorlu qayıqsürmə üzrə (Formula-2) “Grand Prix–2013” turniri çərçivəsində əsas yarış keçirilib. Azerisport.az xəbər verir ki, əvvəlcə Xəzər dənizində məşq prosesi keçirilib.
Hazırlıqda 11 ölkədən 20 pilot iştirak edib. Hazırlıq zamanı pilotlar müxtəlif nümunəvi çıxışlar etmiş, həmçinin sürət şousu göstəriblər.
Sonra yarışa start verilib. Pilotlar 45 dəqiqə ərzində müəyyən olunmuş marşrut üzrə dövrə vurublar. Yarış zamanı İsveç klubları – “Bimba Racing”in üzvü Bimba Sjöholm və “AJO”nun pilotu Tobis Soderling idarəetməni itirərək qayıqlarını aşırıblar. Hər iki idmançı yarışdan kənarlaşdırılıb.
Maraqlı idman mübarizəsi şəraitində keçən yarışda İsveçin “Getel Racing” komandasının pilotu Erik Stark fəxri kürsünün ən yüksək pilləsinə qalxıb. “Azərbaycan” komandasının üzvü Cohan Andersson ikinci, Latviyanın “Riga powerboat” kollektivinin pilotu Ulvis Slakteris isə üçüncü olublar.
Qaliblərə medal, kubok, həmçinin italiyalı dizaynerlər tərəfindən hazırlanmış xüsusi hədiyyələr təqdim olunub. Turnirin xüsusi mükafatı isə B.Sjöholma verilib.
Qeyd edək ki, turnirdə Azərbaycan ilə yanaşı, İsveç, Avstriya, Böyük Britaniya, Norveç, Latviya, Almaniya, Cənubi Afrika Respublikası, İtaliya, Rusiya və Macarıstan idmançıları da birincilik uğrunda mübarizə aparıblar.
