29 oktyabr 2012 15:28
Bakıda dünya kubokunun təsnifat mərhələsi keçirildi
Bakıdakı Binə Atçılıq Mərkəzində atçılığın konkur növü üzrə CSI 2*-W kateqoriyalı dünya Kubokunun təsnifat mərhələsi yarışları keçirilib. Azerisport.az xəbər verir ki, turnirdə Azərbaycan idmançıları ilə yanaşı, İran, Gürcüstan, Almaniya, Qazaxıstan və Türkiyədən olan çaparlar da mübarizə aparıblar.
Turniri İran, Türkiyə və Bolqarıstandan dəvət olunmuş hakimlər briqadası idarə edib. Yarışlar iki hissədən ibarət olub. Əvvəlcə çaparlar nisbətən cavan atlarla yarışda bacarıqlarını nümayiş etdiriblər. Turnirin ilk günü həmyerlimiz Kənan Novruzov “Wasab - 1” ləqəbli atla qələbə qazanıb. Nisbətən təcrübəli atlarla yarışda da Azərbaycan təmsilçisi Patrick Mak Enti qalib gəlib. O “Zidan - D” ləqəbli atla ən yüksək nəticəyə nail olub. Gürcüstanlı Şalva Qaçeçiladze “Dar” ləqəbli atla ikinci, İran nümayəndəsi Maziar Jamşid Xani isə “Van Het Scheef” ləqəbli atla üçüncü yeri tutub.
Yarışların final mərhələsində əvvəlcə iştirakçılar nisbətən cavan atlarla çıxış ediblər. Burda çempionluğu “Samurai MNM” ləqəbli atla almaniyalı Andre Şroeder qazanıb. Turnirin əsas final mərhələsi isə bundan sonra başlayıb. Maraqlı idman mübarizəsi şəraitində keçən son mərhələdə ölkəmizi Pekin və London Yay Olimpiya Oyunlarında təmsil etmiş Camal Rəhimov “Woodie” ləqəbli atla birinci yerə çıxıb. Digər həmyerlimiz Seyid Musayev isə “Concorde 57” ləqəbli atla ikinci olub. Ş.Qaçeçiladze final mərhələsində üçüncü nəticə göstərib.
Qeyd edək ki, iki gün davam edən yarışın ümumi mükafat fondu 56 min ABŞ dolları idi.
