5 oktyabr 2012 01:12
Azərbaycanda keçiriləcək turnir dünyanın 65 kanalında yayımlanacaq
Oktyabrın 26-dan 28-dək Bakıda keçiriləcək “GT3 və klassik formula 1” yarışları dünyanın 65 televiziya kanalında yayımlanacaq. Azerisport.az xəbər verir ki, bu yarışları 130 milyon tamaşaçı izləyəcək.
Bu barədə Almaniyanın “City Challenge” şirkətinin media əlaqələri şöbəsinin rəhbəri Rene de Boer oktyabrın 4-də “Kempinski Hotel Badamdar”da keçirdiyi mətbuat konfransında məlumat verib. Tədbirdə yarışların Azərbaycan Respublikası Gənclər və İdman Nazirliyinin və Almaniyanın “City Challenge” şirkətinin birgə təşkilatçılığı ilə keçiriləcəyi bildirilib.
Qeyd edilib ki, Azərbaycanda bu avtomobil yarışları həm də turizmin inkişafına yönəlib. Tədbir paytaxt sakinlərinə və şəhərimizin qonaqlarına 3 gün ərzində sonsuz zövq verəcək. Yarış zolağı 2,1 kilometr olmaqla Azadlıq meydanı ətrafında olacaq.
Yarışda yerli və beynəlxalq sponsor şirkətlərin sponsorluğu ilə 10 komanda (hər birində 2 sürücü olmaqla) iştirak edəcək.
Bütün təhlükəsizlik qaydaları beynəlxalq və yerli avtoidman federasiyalarının standartlarına uyğun aparılacaq. Bildirilib ki, yarışlarda “Formula 1” üzrə dünya çempionları Jack Villeneuve və Jos Verstappen iştirak edəcəklər. Bundan əlavə, Dənizkənarı Milli Parkda Avropadan gələn müğənnilərin və yerli şou nümayəndələrinin iştirakı ilə böyük konsert proqramı təqdim olunacaq. Eyni zamanda, burada uşaqlar üçün də möhtəşəm əyləncəli proqram təşkil olunacaq.
