4 may 2012 13:11
Avropa çempionatının ilk günündə 1 medal
Böyük Britaniyanın Mançester şəhərində böyüklər arasında taekvondo üzrə Avropa çempionatı start götürüb. Azerisport.az xəbər verir ki, yarışa 14 idmançı ilə qatılan Azərbaycan milli komandası ilk günü 1 gümüş medalla başa vurub.
54 kq çəki dərəcəsində yarışan Mikayıl Əliyev yalnız finalda öz çəkisinin favoritlərindən sayılan rusiyalı Seyfulla Maqomedova uduzub. Mükafatçılara medalları Azərbaycan Taekvondo Federasiyasının I vitse-prezidenti və Avropa Taekvondo İttifaqının vitse prezidenti Füzuli Musayev təqdim edib.
Digər taekvondoçularımıza gəlincə, son saniyələrində qələbəni əldən verən Səbinə Mikayılova (62 kq) ilə Xəyalə Quliyeva (46 kq) mübarizəni bürünc medalın bir addımlığında dayandırmalı olublar. Daha bir taekvondoçumuz Aydın Bəhməlovun (+87 kq) tanınmış idmançı Bəhri Tanrıqulu (Türkiyə) ilə döyüşü uğursuz alınıb.
Mayın 4-də daha 3 idmançımız - Samir Aydınov (58 kq), Fərid Tağızadə (87 kq) və Türkanə Tahirli (49 kq) mübarizəyə qoşulacaqlar.
Qeyd edək ki, Avropa çempionatına mayın 6-da yekun vurulacaq.
