MOK-da Sadıq Sadıqovun 50 illik yubileyi qeyd olunub
Milli Olimpiya Komitəsində İcraiyyə Komitəsinin üzvü, "Neftçi İdman Klubu” İctimai Birliyi idarəetmə aparatının rəhbəri, Azərbaycan Cüdo Federasiyasının vitse-prezidenti Sadıq Sadıqovun 50 illik yubileyinə həsr olunmuş tədbir keçirilib. Azerisport.az xəbər verir ki, tədbirdə idman ictimaiyyətinin nümayəndələri – tanınmış idmançılar və mütəxəssislər iştirak ediblər.
Azərbaycan Milli Olimpiya Komitəsinin vitse-prezidenti Çingiz Hüseynzadə çıxış edərək Sadıq Sadıqovun ölkəmizdə idmanın və Olimpiya Hərəkatının inkişafındakı xidmətlərindən danışdı və bu fəaliyyətinə görə ona təşəkkürünü bildirib. MOK rəsmisi qeyd edib ki, hələ sovet dövründən bu klub idmanın inkişafına böyük dəstək verib, Olimpiya, dünya, Avropa çempionları yetişdirib. Çingiz Hüseynzadə Sadıq Sadıqovun Cüdo Federasiyasının vitse-prezidenti kimi də uğurla fəaliyyət göstərdiyini vurğulayıb.
MOK-un vitse-prezidenti idman sahəsindəki xidmətlərinə görə yubilyarı xüsusi hədiyyə ilə təltif edib.
Milli Olimpiya Komitəsinin vitse-prezidenti Xəzər İsayev də çıxışında Sadıq Sadıqova ən xoş arzularını çatdırıb və onun fəaliyyətini yüksək qiymətləndirib. O, yubilyarın Azərbaycan idman ictimaiyyəti arasında bacarığı və işgüzarlığı ilə seçildiyini söyləyib.
Azərbaycan Güləş Federasiyasının vitse-prezidenti Cavanşir Qurbanov, Olimpiya kateqoriyalı hakim Hicran Şərifov, Bakı Şəhər Gənclər və İdman Baş İdarəsinin rəisi Raqif Abbasov, Olimpiya çempionu Namiq Abdullayev, MOK-un baş katibi Ağacan Abiyev, əməkdar məşqçi Ağayar Axundzadə və "Olimpiya dünyası” qəzetinin baş redaktoru Murad Fərzəliyev Sadıq Sadıqovun fəaliyyəti dövründə əldə etdiyi uğurlardan söhbət açaraq onu peşəkar, hər kəslə dil tapmağı bacaran idarəçi kimi dəyərləndiriblər. Natiqlər yubilyarın hələ "Neftçi” Peşəkar Futbol Klubunun prezidenti olduğu dönəmdə 3 dəfə Azərbaycan çempionluğu, 2 dəfə ölkə kuboku və Avropa Liqasının qrup mərhələsinə vəsiqə sevinci yaşadığını söyləyiblər. Onlar öz xatirələrini bölüşdülər, yubilyarı təbrik edərək, ona uzun ömür, cansağlığı, gələcək fəaliyyətində uğurlar diləyiblər.
Tədbirin sonunda Sadıq Sadıqova MOK və idman ictimaiyyətinin hədiyyələri təqdim olunub.
Səmimi təbriklərə və xoş sözlərə görə təşəkkürünü bildirən yubilyar Azərbaycanda idmanın inkişafı, Olimpiya Hərəkatının genişlənməsi yolunda bundan sonra da səylə çalışacağını bildirib.
