“Çox şadam ki, Azərbaycan xalqına qələbə sevinci yaşada bildim”

Azərbaycanın sərbəst güləş yığmasının üzvü Toğrul Əsgərov (60 kq) London Yay Olimpiadasının finalında Rusiya təmsilçisi ilə görüşdə qazandığı möhtəşəm zəfərdən sonra azerisport.az saytının suallarını cavablandırıb.

 

- Olimpiya çempionu kimi ilk fikirlərinizi bilmək istərdik...

- Mən çox sevincliyəm. Nə hiss etdiyimi sözlə ifadə edə bilmirəm. O qədər emosiya var ki... Nə deyəcəyimi də bilmirəm.

 

- Səhər heç düşünürdüz ki, günü olimpiya çempionu kimi bitirə bilərsiz?
- Bilirdim ki, olimpiya çempionu olmaq lazımdı. Bilirdim ki, ciddi rəqiblərim var. Başa düşürdüm ki, tarixə düşmək üçün şansım var və bundan yararlanmaq lazımdı.

 

- Final görüşündə böyük hesablı qələbəniz (1:0, 5:0) hamı üçün gözlənilməz oldu...

- Elə mənim özüm üçün də hər şeyin belə başa çatması bir qədər gözlənilməz sayıla bilər. Yadınızdadırsa, mən hələ Sofiyada demişdim ki, finalda Kuduxovla mən üz-üzə gələcəyəm. Yəni bunu öncədən də gözləyirdim. Amma o vaxt Kuduxovu böyük hesabla məğlub edəcəyimi deyə bilməzdim.

 

- Onunla görüşə xüsusi hazırlaşmışdınız?
- Bəli, çox ciddi hazırlaşmışdım. Başa düşürdüm ki, geriyə yol yoxdu. Mən çox şadam ki, Azərbaycan xalqına qələbə sevinci yaşada bildim. Bu, mənim üçün ən yaxşı addı.

- Hansı görüş daha çətin keçdi?
- Bütün görüşlərim özünə görə çətin alındı. Bu üzdən qələbəmə görə ikiqat sevincliyəm.