11 avqust 2012 02:59
Azərbaycan - İtaliya - 0:2 (YENİLƏNİB)
Bu gün London Yay Olimpiya oyunlarında çıxışını davam etdirən boks yığmamızın iki üzvü yenidən rinqə çıxıb. Azerisport.az xəbər verir ki, bunlar 91 kq-da çıxış edən Teymur Məmmədovla 91 kq-dan artıq çəki dərəcəsində yarışan Məhəmmədrəsul Məcidov idi.
Xatırladaq ki, hər iki boksçumuz buna qədər Olimpiadada artıq iki görüş keçirmişdi. Teymur 1/8 finalda avstraliyalı Tapu Opetaya, 1/4 finalda isə belaruslu Sergey Korneyevə qalib gəlməklə yarımfinala çıxmışdı. Məcidov isə öncə konqolu Meji Mvanbaya, ardından rusiyalı Məhəmməd Ömərova qalib gəlmişdi. Hər iki boksçumuz özü üçün ən azı bürünc medalı təmin etsə də, bunun əyarını daha da yaxşılaşdırmaq üçün irəli getməyə ehtiyac vardı.
Teymur bu dəfə italiyalı Klemente Russonu mübarizədən kənarlaşdırmalıydı. 30 yaşlı bu boksçu 1/8 finalda Anqola boksçusunu nokautla məğlub etmiş, 1/4 finalda isə Kuba boksçusu Xose Larduetə qalib gəlmişdi – 12:10.
Məmmədovla Russo arasındakı görüşün ilk raundunda həmyerlimiz üstün olub - 3:2. İkinci raundda da Teymur qələbə qazanıb - 6:4. Amma təəssüf ki, son raundda Russo daha üstün olub və ümumi nəticədə 15:13 hesabıyla qalib gələrək, finala yüksəlib. Teymur isə yarışları bürünc medalla bitirmək məcburiyyətində qalıb.
Məcidovun da finala çıxmaq yolundakı rəqibi İtaliya təmsilçisi idi - Roberto Kamarelle. 32 yaşlı bu boksçu 1/8 finalda Ekvador boksçusunu 18:10 hesabı ilə məğlub etmişdi. 1/4 finalda isə Mərakeş boksçusunu 12:11 hesabı ilə üstələmişdi.
Məcidov ilk raundda bu rəqibini məğlub etməyi bacarıb – 6:4. İkinci hissədə eyni hesablı qələbəni italiyalı boksçu qazanıb – 4:6. Belədə, hər şeyə son raunnda aydınlıq gəlib. Çox təəssüf ki, sonda da rəqib boksçu üstün olub – 2:3. Nəticədə, Məmmədovun ardınca Məcidov da Olimpiada ilə vidalaşmalı olub. Təbii ki, bürünc medalla!
