5 avqust 2012 23:55
Azərbaycan Olimpiadada bir gündə iki medala sevindi (YENİLƏNİB)
Bu gün Azərbaycanın yunan-roma güləşçiləri London Yay Olimpiya oyunlarında mübarizəyə start veriblər. Azerisport.az xəbər verir ki, yarışların ilk günündə millimizin iki üzvü öz qüvvəsini sınayıb. Bunlar Rövşən Bayramovla Emin Əhmədov idi.
Belə ki, 55 kq-da mübarizə aparan Rövşən Bayramovun startdakı – 1/16 final mərhələsindəki rəqibi rusiyalı Minqiyan Semyonov olub. Həmyerlimiz bu rəqibini məğlub edib - 1:0, 1:0. Ardından Rövşən amerikalı Tomas Manqoya da eyni aqibəti yaşadıb - 4:0, 4:0. Yarımfinala çıxmaq yolundakı rəqib çinli Li Şujin idi. Bayramov bu rəqibini də məğlub etməyi (3:0, 2:0) və yarımfinala çıxmağı bacarıb. Finala çıxmaq yolunda eyni aqibəti cənubi koreyalı Qyujin Çoya da yaşatmaq lazım idi. Rövşən bunu da bacarıb - 1:0, 2:0. Nəhayət, Bayramovun finaldakı rəqibi iranlı Soryan Reyhanpur olub. Təəssüf ki, Rövşən Pekində olduğu kimi, bu dəfə də finalda uduzub (0:2, 0:1) və gümüş medalla kifayətlənməli olub.
Hər halda bu da Azərbaycan üçün böyük uğur sayıla bilər. Bayramov Londonda ikinci medalımızın müəllifidi. Ondan öncə ağır atletika üzrə yığmamızın üzvü Valentin Xristov bürünc medal qazanmışdı.
74 kq çəki dərəcəsində yarışacaq Emin Əhmədov isə mübarizəyə birbaşa 1/8 finaldan qoşulub. O, İslam Tolba (Misir) – Neven Zuqay (Xorvatiya) cütünün qalibi ilə güləşəcəkdi. Emin sonda xorvatla üz-üzə gəlməli olub və onu məğlub edib - 4:0, 1:0. Onun növbəti rəqibi gürcü Zurab Datunaşvili idi. İlk hissədə gürcü idmançı güclü olub - 3:0. Amma ikinci hissədə Emin bunun əvəzini çxımağı bacarıb - 3:0. Üçüncü hissədə isə Emin möhtəşəm çıxış edərək, 4:0 hesabıyla qələbə qazanıb və yarımfinala yüksəlib. Yarımfinaldakı rəqib erməni idmançı Arsen Julfalakyan idi. Çox təəssüf ki, Emin bu görüşdə 0:2, 0:3 hesabıyla uduzaraq, finala çıxa bilməyib. Amma Əhmədov bir təsəlliverici görüşdə qələbə qazanmaqla Azərbaycana bürünc medal qazandıra bilərdi. Bu yolda onun rəqibi Belarus idmançısı Aleksandr Kikinov olub. Güləşçimiz ilk hissədə ona uduzub - 0:2. İkinci yarıda isə Emin bunun əvəzini çıxıb (2:0) və görüşü üçüncü hissəyə daşıyıb. Əlavə raundda isə yenə Emin qələbə qazanıb - 1:0. Beləliklə, Bayramovun ardınca Əhmədov da Azərbaycana medal qazandırıb. Bürünc də olsa, hər halda bu da uğurdu. Hər iki güləşçimizi təbrik edirik!
