29 iyul 2012 18:48
Tərlan Kərimov Olimpiadanı 7-ci pillədə bitirdi (YENİLƏNİB)
Bu gün Azərbaycanın daha bir cüdoçusu London olimpiadasında qüvvəsini sınayıb. Azerisport.az xəbər verir ki, 66 kq çəki dərəcəsində yarışan Tərlan Kərimov olimpiya qızılını qazanmağa çalışıb.
Qeyd edək ki, həmyerlimiz mübarizəyə 1/16 final mərhələsindən başlayıb. Tərlanın ilk rəqibi rusiyalı Musa Moquşkov idi. İdmançımız bu rəqibini əlavə vaxtda məğlub edərək, 1/8 finala yüksəlib.
1/8 finalda onun rəqibi Misir idmançısı Əhməd Avad olub. Bu cüdoçu 1/16 finalda Humaid Alderey (BƏƏ) üzərində qələbə qazanmışdı. Lakin Tərlan bu rəqibi üzərində aşkar qələbə qazanıb və 1/4 finala vəsiqə əldə edib - 2:0.
Kərimovun yarımfinala çıxmaq yolundakı rəqibi Suqoy Uriarte idi (İspaniya). O, 1/8 finalda Andorra təmsilçisi Daniel Qonsales Qarsiyanı məğlub edib. Bundan əvvəl isə İtaliya və Aruba təmsilçilərini mübarizədən kənarlaşdırıb. Təəssüf ki, Tərlan da bu rəqibi ilə görüşdə məğlubiyyətlə üzləşib.
Amma idmançımızın hələ təsəlliverici görüşlərdə qüvvəsini sınamaq şansı qalırdı. Onun bu yolda ilk rəqibi isə polşalı Pavel Zaqrodnik idi. Çox təəssüf ki, o, elə bu rəqibinə uduzaraq, bürünc medal qazanmaq şansını da əldən verib və Olimpiadanı yeddinci yerdə başa vurub.
Xatırladaq ki, olimpiadada cüdoçularımızdan ilk olaraq İlqar Muşkiyev qüvvəsini sınayıb. Lakin 60 kq-da mübarizə aparan təmsilçimiz elə ilk cəhdindəcə məğlub olub.
