19 aprel 2012 17:32
Xarici ölkələrdə idmançılarımıza qarşı təxribat törədilə bilər
Ağırlıqqaldırma üzrə Azərbaycan milli komandası 2012-ci il London Yay Olimpiya Oyunlarınadək qalan müddətdə ölkəmizdən kənara çıxmayacaq. Azerisport.az xəbər verir ki, bu haqda Azərbaycan Ağır Atletika Federasiyasının (AAAF) icraçı direktoru İsgəndər Əsgərov məlumat verib.
Onun sözlərinə görə, olimpiadaya lisenziya qazanan 5 kişi və 1 qadın idmançımıza qarşı xaricdə təxribat törədilə bilər: “İndi Londona hazırlığın son mərhələsidir. Bu dövrdə çox diqqətli olmalıyıq. Xaricə getsək, ağırlıqqaldıranlarımıza qarşı təxribat törədə bilərlər. Hər şey mümkündür. Yeməyin də, suyun da tərkibində istifadəsi qadağan olunmuş maddələr qata bilərlər. Ona görə də olimpiadayadək yalnız ölkə daxilində qapalı şəraitdə hazırlaşacağıq”.
Bu yaxınlarda Türkiyənin Antalya şəhərində keçirilmiş Avropa çempionatında ölkəmiz 7 qızıl, 2 gümüş, 6 bürünc medal qazanıb. Qızıl medal sahibləri arasında qadın ağırlıqqaldıranımız Boyanka Kostova (58 kq) da olub. Qadınlardan ibarət yığmamız ümumi komanda hesabında 1-ci yeri tutaraq, London olimpiadasına 1 lisenziya əldə edib. Lakin İ.Əsgərovun sözlərinə görə, qadın atletlərimiz 2010-cu il dünya çempionatında 3 nəfərlə təmsil olunsaydılar, indi ən azı 3 olimpiya lisenziyasına sahib ola bilərdilər: “Qadın atletlərimiz 2010-cu ildə Türkiyədə keçirilmiş dünya çempionatında cəmi 7 xal toplaya bilmişdilər. Ötən il Fransada ölkəmiz daha 61 xal qazansa da, bu, ilk “22-liy”ə düşməyə imkan vermədi. Çünki ilk yarışda lazımi miqdarda xal toplaya bilməmişdik. Həmin vaxt yetərincə qadın atletimiz olmadığından, qardaş ölkəyə cəmi 2-ni apara bilmişdik. Onlardan da 1-i zədələndiyi üçün “körpücük” üzərinə çıxmamışdı. Fransadakı növbəti dünya çempionatında yaxşı çıxış etsək də, cəmi xalımız ümumi komanda hesabında lisenziya qazanmağa imkan verməmişdi. Avropa çempionatında isə 4 qadın atletimizdən 3-ü mükafatçılar sırasına düşməyi bacardı. Nəticədə komanda hesabında 1-ci olduq və müstəqillik tarixində ilk dəfə qadınlar arasında da 1 lisenziya qazandıq”.
Bununla yanaşı, federasiya rəsmisi bildirib ki, hətta ölkəmiz ümumi nəticədə 1-ci yeri tuta bilməsəydi də, lisenziya qazanacaqdı: “Çünki Boyanka Kostova Avropa çempionu oldu. Onun güzəştli kartla olimpiadaya qatılmasına icazə veriləcəkdi. Amma bu halda Londona yalnız Kostova gedə bilərdi. Yəni, qalan müddətdə zədələnsəydi, onu kiminləsə əvəzləməyimizə icazə verilməyəcəkdi. İndiki halda isə yeganə lisenziya ölkəmizə verilib və olimpiadaya ən hazırlıqlı atletimizi göndərmək hüququna malikik”.
Qeyd edək ki, 2012-ci il London Yay Olimpiya Oyunları 27 iyul – 12 avqustda keçiriləcək. (Lent.az)
