Olimpiya məşəlini 28 polis qoruyacaq

Gələn il May ayının 19-da 2012-ci il London olimpiya oyunlarının estafeti start götürəcək. Estafet İngiltərənin qərb qurtaracağı - Kornuoll yarımadasındakı Lends-End burnundan başlayacaq və olimpiya məşəli yürüş boyunca 24 saat ərzində 28 polisin müşayiəti altında qorunacaq. Məlumatı İTAR-TASS agentliyi Skotlend-Yarda istinadən yayıb.

 

Azerisport.az xəbər verir ki, bu məqsədlə asayiş keşikçiləri 664 müraciətdən xüsusi olaraq seçilib. Onların qarşısına olimpiya məşəlini və estafet mərasimini kütləvi etirazlardan, dissident qruplardan qorumaq tapşırığı qoyulub.

 

London Olimpiyadası ərəfəsndə əvvəlki estafetlərdən fərqli olaraq olimpiya məşəli yer kürəsini dolanmayacaq və yalnız Britaniya ərazisində yürüşlə məhdudlaşacaq. Məşəl olimpiyadanın ev sahibinə Yunanıstan ərazisindən keçdikdən sonra təşrif buyuracaq.

 

70 gün ərzində məşəli qoruyacaq 28 polis və yürüş boyu məşəli gəzdirmək şərəfi qazanmış səkkiz min insan xüsusi uniforma geyinəcək. Onlar silahsız olacaq. Hüquq mühafizə orqanlarının səkkiz nümayəndəsi ehtiyatda olacaq. Məşəldarı hər an ən azı iki polis nəfəri müşayiət edəcək.

 

London Olimpiyadasının təhlükəsizliyinin təmini üzrə koordinator, Böyük Londonun polis komissarının müavini Kris Ellisonun sözlərinə görə məşəlin estafetinə təhlükə ilə bağlı hər hansı məlumat daxil olmayıb. “Əgər adamlar çıxarsa, bizim etirazçılarla iş aparacağımız aydındır”, deyə o, bildirib. Estafet boyunca məşəl 12800 km-dən artıq yol qət edəcək. 27 İyulda olimpiya oyunlarının açılış mərasimindən qabaq məşəlin odu ilə London olimpiya stadionu üzərindəki kasa alovlandırılacaq. Olimpiya məşəlinin keçəcəyi yolda ilk 74 məntəqə artıq müəyyənləşdirilib. Olimpiya odu Britaniyanın hər ölkəsi və ərazi vahidi daxil olmaqla altı adadan keçəcək.

 

Bristol, Kardiff, Liverpul, Belfast, Qlazqo, Nyukasl, Mançester, Şeffild, Nottinqem, Oksford bu şəhərlər siyahısındadır. Məşəl nəinki iri şəhərlər, hətta kiçik yaşayış məntəqələri və kəndlərdən də keçəcək. Bura Britaniyanın gözəl guşələrindən olan adalar da daxildir. Həmçinin bir neçə idman obyekti və ictimai mərkəz də məşəlin yolu üzərindədir.

 

Tədbirin təşkilat komitəsindən bildiriblər ki, yürüş yolu qəti olaraq məyyənləşməyib və qalan məntəqələrin adları yaxın aylarda bildiriləcək. Məsələn, estafetin İrlandiyanın paytaxtı Dublinindən keçməsinin mümkünlüyü ilə bağlı müakirələr gedir. Estafeti keçəcək səkkiz min məşəldarın seçimi artıq başlayıb. Onların əksəri ictimaiyyət nümayəndələridir.

 

Xatırladaq ki, müasir Olimpiya oyunları üçün alov Olimpdə xüsusi parobolik güzgü vasitəsi ilə günəş şüalarından alovlandırılır. Sonra səyahətini bütün Yunanıstan boyunca davam edir. Daha sonra məşəl olimpiya oyunlarını qəbul edəcək ölkəyə yollanır və estafetə başlayır.