Sadıq Sadıqov: Bu tərəfdaşlıq yalnız Azərbaycan cüdosunun inkişafına xidmət edəcək
Dünən SOCAR və Beynəlxalq Cüdo Federasiyası (İJF) arasında tərəfdaşlıq müqaviləsi imzalanıb. Azerisport.az xəbər verir ki, bu sözləşmə barədə daha ətraflı məlumat almaq üçün Azərbaycan Cüdo Federasiyasının vitse-prezidenti Sadıq Sadıqova müraciət etdik. Sadıq Sadıqov açıqlamasında qeyd etdi ki, bu sözləşmə yalnız Azərbaycan cüdosunun inkişafına xidmət edəcək:
“Ötən ilin oktyabr ayında Parisdə Azərbaycan Cüdo Federasiyası və Beynəlxaq Cüdo Federasiyasının rəhbərlərinin görüşündə və Marius Vizerin bu ilin əvvəlində Bakıya səfəri zamanı Azərbaycanda cüdonun inkişafı ilə bağlı bir çox məsələlər müzakirə olunmuş, SOCAR-la Beynəlxalq Cüdo Federasiyası arasında 4 illik tərəfdaşlıq müqaviləsi imzalanması haqqında razılıq əldə edilmişdir. Bu il Olimpiya ili sayılır və bu dövr ərzində Beynəlxalq Cüdo Federasiyasının xüsusi inkişaf proqramı mövcuddur. İmzalanan Tərəfdaşlıq müqaviləsi də, bizə həmin proqram çərçivəsində ölkəmiz üçün müxtəlif layihələrin həyata keçirilməsi imkanı yaradacaqdır . Eləcə də Beynəlxalq Cüdo Federasiyası tərəfindən azərbaycanlı məşqçi və hakimlər üçün seminarlar təşkil olunacaq”.
Sadıq Sadıqov həmin layihələrin nədən ibarət olduğunu da açıqlayıb: “Həmin layihələrdə Azərbaycan regionlarında cüdonun inkişaf proqramları da nəzərdə tutulur. Cüdo məktəblərinin və digər infrastrukturların yaradılması, fəaliyyətdə olan məktəblərin və seksiyaların inventarlarlarla təchiz olunması, metodik vasitələr və yardımlar da nəzərdə tutulmuşdur. Bütün bunlar isə yeni istedadların üzə çıxmasına və Azərbaycan cüdosunun inkişafına töhfə verəcəkdir”. (ACF)
