İlham Zəkiyev Əbu-Dabidə

Xəbər verdiyimiz kimi, Birləşmiş Ərəb Əmirliklərinin paytaxtı Əbu-Dabidə gənc cüdoçuların dünya birinciliyi keçirilir. Azerisport.az xəbər verir ki, Azərbaycanın gənclərdən ibarət yığma komandası da bu yarışda iştirak edir.

“Neftçi İdman Klubu”nun paralimpiyaçı cüdoçusu, ikiqat paralimpiya çempionu, ikiqat dünya və beşqat Avropa çempionu, əməkdar idman ustası, “Şöhrət” ordenli, “Tərəqqi” medal sahibi, Heydər Əliyev Fondunun təsis etdiyi beynəlxalq “Qızıl çinar” mükafatının laureatı İlham Zəkiyev gənclərin dünya birinciliyində paralimpiya cüdosunun təqdimatı münasibətilə Beynəlxalq Cüdo Federasiyası (İJF) tərəfindən Əbu-Dabiyə dəvət olunmuşdu. Zəkiyev və digər təmsilçisimiz, Azərbaycanın paralimpiyaçı cüdoçularından ibarət milli komandanın üzvü Kənan Abdulxanlı ilə birlikdə nümunəvi çıxışlar ediblər.

Yarışın keçirildiyi idman sarayında respublikamızın fəxri, dünya paracüdosunun ulduz idmançısı İlham Zəkiyevin erməni snayperi tərəfindən vurularaq görmə qabiliyyətini itirməsi elan olunub.

Sonra paralimpiyaçı cüdoçuların test yarışları keçirilib.