Elnur Məmmədlu cüdoçuların aksiyasından danışdı

Azərbaycan Cüdo Federasiyasının vitse-prezidenti, olimpiya çempionu Elnur Məmmədli cüdoçuların bir neçə aydır maaş ala bilmələrinə görə etiraz aksiyası keçirməsini düzgün qərar hesab etmir. Azerisport.az saytına açıqlamasında Məmmədli problemi federasiyanın daxilində həll etməyin vacibliyindən danışıb:

"Mənə bu barədə deyəndə dedim ki, gəlin hər bir məsələni federasiyanın daxilində həll edək. Hər bir idman növündə narazılıq ola bilər. Bu, adi haldır. Amma əsas onu daxildə həll etməkdir. Bu mənada cüdoçuların düzgün hərəkət etmədiyini düşünürəm. Ola bilər, nədənsə narazıdırlar. Hazırlıq baxımından problem ola bilməz. İndi şəhərin mərkəzində gözəl bazamız var. Mən olimpiya çempionu olanda heç bazamız yox idi. Məvaciblərini alırlar. Bir-iki gün gecikmə hər yerdə olur. Xarici ölkələrdə hazırlıq keçirlər. Yaxınlarda Almaniyada Qran-Pri turnirində çıxış ediblər. Federasiya rəhbərliyi bu gün hər bir məsələni həll etməyə hazırlaşır. Çünki, yayda hamımız Avropa Oyunlarında uğur qazanmaq istəyirik. Yeni iş həftəsində onlarla görüşüb bütün məsələləri müzakirə etməyə çalışacayıq”.

Qeyd edək ki, etiraz aksiyası keçirən milli komandanın üzvləri Azərbaycan Cüdo Federasiyasından maaşlarının verilməsini tələb ediblər. Aksiyada Ermənistanın paytaxtı İrəvanda keçirilən gənclər arasında dünya çempionatının qalibi olmuş Elmar Qasımov və Azərbaycanın ən tanınmış cüdoçularından olan Nicat Şıxəlizadə, Elxan Məmmədov da iştirak edib.