7 oktyabr 2013 13:15
Cüdo mərkəzi niyə tikilmir?
Ötən ilin sonunda Azərbaycan Cüdo-İdman Kompleksinin təməli qoyulmuşdu. Azerisport.az xəbər verir ki, bu mərasimdə gənclər və idman naziri Azad Rəhimov, Cüdo federasiyasının prezidenti Fizuli Ələkbərov, Milli Paralimpiya Komitəsinin prezidenti İlqar Rəhimov, ölkənin idman ictimaiyyətinin nümayəndələri və tanınmış çempionlar iştirak etmişdilər.
Paytaxtın Nərimanov rayonunda, Tofiq Bəhramov adına Respublika stadionun ərazisində inşasına başlanılan və 2014-cü ilin sonlarında istifadəyə verilməsi nəzərdə tutulan idman qurğusu 4500 kv. m-lik sahəyə, 2 min nəfərlik tamaşaçı tutumuna malik olacaq. Kompleksin tərkibinə 8 mərtəbəli mehmanxana, poliklinika, laboratoriya, fizioterapiya və sağlamlıq mərkəzi, restoran, trenajor zalı və spa mərkəzi də daxildi.
Artıq təməlqoya mərasimindən xeyli müddət keçib. Amma ortada səs-səmir yoxdu. Tikintinin hansı mərhələdə olması ilə bağlı federasiya tərəfindən KİV-ə vaxtaşırı heç bir açıqlama verilmir. Son aylar baş arenada olarkən, tikintinin girişində vurulmuş kompleksin plenketinə daha rast gəlmirik.
İşin gedişi ilə maraqlanmaq üçün sözügedən məkana yollandıq. Stadionda çalışanlar bildirdilər ki, burada Gənclər və İdman Nazirliyinin xətti ilə idmançılar üçün otel inşa olunur. Düzü, bu, öncədən də məlum idi.
Belədə, 4 yandan hasarlanmış keçmiş AMAY-ın ərazisinə diqqət yetirdik. Orada da qızğın iş gedirdi. Tikintini qoruyan mühafizəçi əməkdaşımıza dedi ki, burada, ümumən, idmanla bağlı qurğu tikilmir. Həmin ərazidə böyük ticarət mərkəzi yerləşəcək.
Qeydə aldığımız fotolar da Cüdo-İdman Kompleksinin paytaxtda inşasının yenə də ertələndiyini ehtimal edir.
Xatırlayırsınızsa, 7-8 il bundan öncə “8-ci kilometr” qəsəbəsində analoji idman qurğusunun inşa ediləcəyi ilə bağlı ictimaiyyətə qeyri-rəsmi məlumat verilmişdi. Amma bir müddət sonra, söhbət öz-özünə qapanmışdı.
