22 aprel 2013 16:52
Azərbaycan Teplitsedə ikinci oldu
Çexiyanın Teplitse şəhərində gənc oğlanlar və qızlar arasında cüdo üzrə Avropa Kuboku yarışlarında Azərbaycan komandası dörd qızıl və bir gümüş medal qazanıb. Azerisport.az xəbər verir ki, 55 kq çəki dərəcəsində final görüşündə qarşılaşan idmançıların hər ikisi Azərbaycan nümayəndələri olub. İlkin Babazadə Fərid Qardaşxanova qalib gəlib.
50 kq çəki dərəcəsində həlledici döyüşdə Xəzər Həsənov Belçika nümayəndəsi Vladislav Limi məğlub edərək fəxri kürsünün ən yüksək pilləsinə qalxıb.
60 kq çəki dərəcəsində çıxış edən Rauf Xəlilov da qızıl medal qazanıb. O, final görüşündə İtaliya nümayəndəsi Elios Manzidən üstün olduğunu sübut edib. Qızlar arasında 40 kq çəki dərəcəsində çıxış edən Leyla Əliyeva da əla çıxış edib. O, qızıl medal uğrunda döyüşdə hollandiyalı Anek Norderdən daha güclü olduğunu göstərib.
Ümumi hesabda Azərbaycan komandası yalnız Almaniya komandasından (6-3-7) geri qalaraq ikinci yeri tutub.
