18 iyun 2011 22:05
Braziliyada uğursuz ilk gün (YENİLƏNİB)
Bu gün Braziliyanın Rio-de-Janeyro şəhərində cüdo üzrə “Böyük dəbilqə” turnirinə start verilib. Azerisport.az xəbər verir ki, mötəbər yarışın ilk günündə Azərbaycan yığması 5 idmançısı ilə təmsil olunub.
60 kq-da mübarizə aparan iki cüdoçumuz vardı. Bunlardan biri Nicat Şıxəlizadəydi. O, startda Olimpiadanın mükafatçısı olmuş Avstriya təmsilçisi Lyüdviq Peyşeri mübarizədən kənarlaşdırıb. Növbəti mərhələdə isə ona kanadalı Sercio Pessoaya da eyni aqibəti yaşatmaq lazım idi. Amma təəssüf ki, Kanada idmançısı təmsilçimizi müarizədən kənarlaşdırıb.
Bu çəki dərəcəsindəki digər təmsilçimiz isə İlqar Muşkiyev idi. Bir müddət öncə Estoniyanın Tallin şəhərində qalib olmuş Muşkiyev bu dəfə ilk sınağına ekvadorlu Xose Romero ilə çıxıb və onu mübarizədən kənarlaşdırıb. Növbəti rəqib isə fransalı Sofian Milu idi. Cüdoçumuz məhz bu rəqibinə ipponla uduzaraq, mübarizəni dayandırıb.
66 kq çəkidə bütün diqqətlər Tərlan Kərimova yönəlmişdi. Tərlan ilk döyüşünü meydan sahibi olan Çarlz Çibana qarşı keçirib. İdmançımız görüşə yaxşı başlasa da, sonda qələbə qazanan tərəf braziyalı olub. Beləcə, komandamız Kərimovla da istəyinə çata bilməyib.
Qadın cüdoçularımıza gəlincə, ilk gündə 57 kq-da yarışa qoşulan Kifayət Qasımova startda meksikalı Anna Leonla görüşüb və onu problemsiz keçib. Növbəti rəqib isə rumıniyalı Andrea Çitu olub və idmançımız məğlub olaraq, mübarizəni dayandırıb.
Ramilə Yusubova isə (63 кг) başlanğıcda Çili idmançısı Karina Orellanuya qalib gəlməyi bacarıb. Növbəti rəqib isə ekvadorlu Yussis Barreto olub və Yusubova onu da mübarizədən kənarlaşdırıb. 1/4 finalda isə Ramiləni yaponiyalı Kana Abe dayandırıb.
Qeyd edək ki, “Böyük dəbilqə” turniri nokaut sistemi üzrə keçirilir. Yarımfinalda uduzan atletlər avtomatik olaraq bürünc mükafatçı olurlar. Yarışın mükafat fondu isə 150 min dollardı.
