23 aprel 2011 14:07
AÇ-2011: Azərbaycan üçün uğursuz gün (YENİLƏNİB)
Türkiyənin İstanbul şəhərində Azərbaycan yığmasının da iştirakıyla keçirilən cüdo üzrə Avropa çempionatı davam edir. Azerisport.az xəbər verir ki, yarışların üçüncü günündə daha 4 idmançımız medal qazanmaq üçün şansını sınayıb.
90 kq-da əsas diqqətlər Elxan Məmmədova yönəlmişdi. Avropa birinciliklərində 3 dəfə medal qazanmış idmançımız startda serbiyalı Nikola Nikoliçi mübarizədən kənarlaşdırmalıydı. Lakin Məmmədov startdaca uduzaraq, mübarizəni dayandırmaq məcburiyyətində qalıb.
100 kq-da ölkəmizin şərəfini Elmar Qasımov layiqincə qorumağa çalışacaqdı. Lakin o da ilk döyüşündə danimarkalı Frederik Yorgensenə uduzub.
Bu çəki dərəcəsində digər təmsilçimiz isə Sain Məmmədov idi. İdmançımız startdakı rəqibi türkiyəli Burhan Kocana ipponla uduzaraq, mübarizəni erkən dayandırıb.
100 kq-dan artıq çəki dərəcəsindəki təmsilçimiz Emil Tahirov isə ilk döyüşündə rusiyalı Dmitri Sterxova qalib gəlməyi bacarıb. Növbəti rəqib isə fransalı Teddi Riner idi. Dünyanın ən güclülərindən olan bu idmançıyla duel Tahirov üçün də uğursuz alınıb.
Qeyd edək ki, bu Avropa çempionatı lisenziya xarakterlidi. Turnirin hər bir qalibi 180 reytinq xalı toplamış olacaq. Komandamız yarışların ilk iki günündə 10 idmançıyla mübarizəyə qoşulsa da, cəmi iki idmançımız uğur qazana bilib. İlk gündə Tərlan Kərimov gümüş, dünən isə Elnur Məmmədli ölkəmizə qızıl medal qazandırmışdı.
