21 aprel 2011 20:45
Qasımova bürünc, Kərimov qızıl medal şansını əldən verdi (YENİLƏNİB)
Bu gün Türkiyənin İstanbul şəhərində cüdo üzrə Avropa çempionatına start verilib. Azerisport.az xəbər verir ki, Azərbaycan millisinin də mübarizə apardığı turnirin ilk günündə 5 idmançımız şansını sınayıb.
60 kq-dakı təmsilçilərimizdən Nicat Şıxəlizadə yenidən özünü sübut etməli idi. 4 il müddətində diskvalifikasiyaya məruz qalan idmançımız bu günlərdə bağışlanmışdı və bu, onun qayıdışından sonrakı ilk sınağıydı. Şıxəlizadənin ilk rəqibi isə Rusiyalı Beslan Mudranov olub. Böyük idmana qayıdışını intizarla gözləyən həmyerlimiz elə ik görüşdəcə rəqibini ipponla məğlub edərək, növbəti mərhələyə adlayıb. Burda o, almaniyalı Tobias Englmayerə də eyni aqibəti yaşatmalıydı. Lakin təəssüf ki, rəqibi ondan daha güclü çıxıb.
Bu çəki dərəcəsindəki digər təmsilçimiz İlqar Muşkiyev isə Avropa birinciliyində debüt edirdi. O, startda britaniyalı Eşki Makkenzini mübarizədən kənarlaşdırmağı bacarıb. Növbəti mərhələdəki rəqib isə, hollandiyalı Jeron Moren idi. Bu rəqibinə də qalib gələn həmyerlimiz növbəti qarşılaşmada gürcü Betkil Şukvaniyə yenilib. Lakin onun bürünc medal qazanmaq şansı qalırdı. Bunun üçün o, italiyalı Elio Verdeyə qalib gəlməli olsa da, bu vəzifənin də öhdəsindən gələ bilməyib və medalsız qalıb.
66 kq çəki dərəcəsində də ölkəmiz iki idmançıyla təmsil olunur. Samir Dadaşzadə ilk mərhələdə istirahət edərək yalnız növbəti mərhələdəki rəqibinin kimliyini gözləyirdi. Lakin o, ilk sınağında qarşılaşdığı Laslo Joke (Rumıniya) ilə mübarizədən qalib ayrıla bilməyib.
Eyni çəki dərəcəsindəki digər təmsilçimiz Tərlan Kərimov isə startda fransalı David Larosla münasibətlərinə aydınlıq gətirib və qələbə qazanıb. Növbəti mərhələdə isə idmançımız gürcü Şalva Kardavadan güclü olduğunu göstərib. Ardından rusiyalı Musa Moquşkova da qalib gələn həmyerlimiz adını yarımfinala yazdırıb. Həlledici görüşə vəsiqə uğrunda Tərlanı britaniyalı Kolin Oateslə döyüş gözləyirdi ki, idmançımız ona da qalib gələrək finala çıxıb. Yalnız final görüşündə macarıstanlı Miklos Unqvari ilə mübarizədə məğlub olaraq gümüş medalla kifayətlənib.
Qadın cüdoçularımızdan isə yarışların ilk günündə yalnız Kifayət Qasımova (57 kq) qızıl medal qazanmaq yolunda şansını sınayır. Onun ilk rəqibi Andrea Stefaniya Çitu (Rumıniya) olub. İdmançımız bu rəqibini məğlub etməyi bacarıb və növbəti mərhələyə adlayıb. 1/8 finalda Qasımova Macarıstandan olan Hedviq Karakas gözləyirdi. Bu rəqibini də mübarizədən kənarlaşdıran Kifayəti fransalı Automne Pavia ilə dueldən də qalib ayrılaraq, adını yarımfinala yazdırıb. Həlledici görüşə vəsiqə uğrunda Qasımovanı portuqaliyalı Telma Monteroyla duel gözləyirdi. Gəl ki, idmançımız ona məğlub olub. Kifayət rusiyalı İrina Jabludina ilə dueldə bürünc medal qazanmağa çalışsa da, bu cəhdi də faydasız qalıb.
Qeyd edək ki, bu Avropa çempionatı lisenziya xarakterlidi. Turnirin hər bir qalibi 180 reytinq xalı toplamış olacaq.
