Fabiano Karuana: Olimpiadanın təşkilatçıları çox böyük iş görüblər

Bakıda keçirilən 42-ci Ümumdünya Şahmat Olimpiadasının altıncı turunda ABŞ millisi buna qədər xal itirməyən Ukraynanı məğlub edib. Azerisport.az xəbər verir ki, görüş 2,5:1,5 hesabı ilə nəticələnib. ABŞ yığmasının lideri Fabiano Karuananın Pavel Elyanovu məğlub etməsi ABŞ-a qələbə qazandırıb.

Bakı Şahmat Olimpiadasının mətbuat xidməti xəbər verir ki, partiyadan sonra Karuananın iştirakı ilə mətbuat konfransı keçirilib. 24 yaşlı şahmatçı qələbəsini belə şərh edib: “Hələ ki turnir istədiyimiz kimi keçir. 6 tur ərzində uduzmamışıq. Üstəlik, Rusiya və Çin kimi komandaları turnir cədvəlində qabaqlayırıq. Bu, uğurlu nəticədir. ABŞ-ın hazırkı heyəti gənclərdən ibarətdir. Ukrayna ilə görüşümüz çətin alındı. Amma mən vəziyyətdən maksimum yararlanmağı bacardım”.

Fabiano Karuana qeyd edib ki, dünən Olimpiadada istirahət günü olması onun işinə yarayıb: “Dünən şahmat barədə düşünməməyə çalışdım. İstəyirdim ki, beynim təmizlənsin. Daha sonra isə tam gücümüzlə Ukraynaya qarşı mübarizə apardıq. Sevinirəm ki, güclü rəqib üzərində qələbə qazanmağa müvəffəq olduq”.

Əslən İtaliyadan olan qrossmeyster Bakıda keçirilən Şahmat Olimpiadasının yüksək təşkilatçılığına da toxunub: “Yarış çox yüksək səviyyədə keçirilir. Təşkilatçılar çox böyük iş görüblər. Bunu görməmək mümkün deyil. Belə gözəl şəraitdə idmançılara yalnız fikrini oyunlara yönəltmək qalır”.