Nərgiz Umudova: Oyun təkqapıya getdi
42-ci Ümumdünya Şahmat Olimpiadasının 4-cü turunda qadınlardan ibarət ikinci milli komandamızın üzvü, dördüncü lövhədə yarışan Nərgiz Umudova italiyalı Alessia Santeramonu məğlub edib. Azerisport.az xəbər verir ki, görüşdən sonra təcrübəli şahmatçımız jurnalistlər üçün brifinq təşkil edib.
- Əvvəlcə görüş haqda fikirlərinizi bildirərdiniz.
- Bu gün İtaliyaya qarşı oynayırıq. Rəqibin heyətində 2 təcrübəli, 2 də gənc şahmatçı yer alıb. Son lövhədəki rəqibim Alessia Santeramo gənc şahmatçıdır. Ağlarla oynayırdım. Əvvəldən üstünlüyə yiyələndim və qələbə qazandım. Demək olar ki, oyun təkqapıya getdi.
- Belə çıxır ki, rəqibi yaxşı analiz etmişdiniz?
- Rəqib reytinqdə məndən aşağı idi. Bu halda qələbə qazanmalı idim. Sevinirəm ki, qarşıya qoyulan tapşırığın öhdəsindən gəldim.
- 4 turdan sonra ikinci milli komandamızın çıxışını necə dəyərləndirmək olar?
- Qarşıda hələ 7 tur var. Dünən təsadüf nəticəsində Almaniya ilə heç-heçə etdik. Rəqibim reytinqə görə 10-cu komanda olsa da, biz qələbə qazanmalı idik. Oyunların gedişindən əksəriyyət 3:1 hesablı qələbə gözləyirdi. Lakin ani diqqətsizlik heç-heçə oynamağımızla nəticələndi. Ümumiyyətlə, qarşılaşdığımız rəqiblər zəif deyil. Monqolustana qalib gəldik, almanlarla heç-heçə oynadıq. Bu gün üz-üzə gəldiyimiz İtaliya da güclü rəqibdir. Almanlar güclü olsalar da, heç-heçəyə görə çox əziyyət çəkməli oldular.
- Almaniya ilə görüşdə qələbəni əldən verdiyimizi qeyd etdiniz. Bu, kimin səhvi idi?
- Komanda yarışında belə hallar olur. Gərginlikdən son 2 oyunda gözlənilmədən səhvlər baş verdi və yekunda heç-heçə qeydə alındı. Kimisə günahlandırmaq düzgün deyil.
- 4 turdan 3-də oynamısınız. Qarşılaşdığınız rəqibərlə daha əvvəl görüşmüşdünüz?
- Xeyr, onlardan heç biri ilə daha əvvəl görüşməmişdim.
- Bu olimpiadada yer aldığınız komandanın kapitanı Sərxan Quliyevdir. Onun fəaliyyətini necə dəyərləndirmək olar?
- Kapitanımız Sərxan Quliyevdir. Anar Allahverdiyev də bizimlə birgə çalışır. Onun rəhbərliyi altında 2007 və 2008-ci ildə də çıxış etmişik.
- Lövhələrin seçimi ilə bağlı kapitan sizinlə məsləhətləşir?
- Xeyr, hər hansı məsləhət olmur. Yekun qərarı o özü qəbul edir.
- Bildiyimiz qədəri ilə tezliklə ailə həyatı qurmağa hazırlaşırsınız. Ailə həyatı qurduqdan sonra karyeranızı davam etdirəcəksiniz?
- Bəzi şeyləri hələ ki sirr saxlamaq istərdim.
- Hər halda, şahmata davam edib-etməyəcəyiniz maraqlıdır...
- Karyeramı davam etdirəcəyəm. Hətta bu yaxınlarda universitetə də daxil olmuşam. Xaricdə təhsil alacağam.
- Maraqlıdır, şəxsi məşqçiniz kimdir?
- Hazırda şahmatla daim məşğul olmuram. Əsasən yarışlardan öncə toplanışlarda iştirak edirəm.
